މިނިސްޓްރީ އޮފް ޔޫތް އެމްޕަވާމަންޓް، އިންފޮމޭޝަން އެންޑް އާޓްސްގެ ޑެޕިއުޓީ މިނިސްޓަރުކަމުގެ މަޤާމަށް މަރިޔަމް ޝިއުނާ އަކީ ވަރަށް އެކަށީގެންވާ އަންހެން ބޭފުޅެކެވެ.
ޝިއުނާ (ނަންނަ) ވަޒީރުންގެ ނައިބުން ފެންބަރުގެ މަޤާމަކަށް އައްޔަންކުރެއްވުމުން ބައެއް މީހުންގެ ފާޑުކިއުންތައް ވަނީ އަމާޒުވެފައެވެ. އެއީ ތަޢުލީމީ ގޮތުންނާއި ތަޖުރިބާގެ ގޮތުން އެފަދަ މަޤާމަކަށް އެކަށީގެންވާ ބޭފުޅެއް ނޫންކަމަށް ބުނެ ބައެއް މީހުން ސޯޝަލް މީޑިޔާގައި ޝުޢޫރު ފާޅުކުރައްވާފައި ވެއެވެ. އެހެން ނަމަވެސް ޙަޤީޤަތަކީ އަދި އެއީ އެއް ނޫނެވެ. ޝިއުނާ އަކީ އެފަދަ މަޤާމަކަށް ހަމަ އެންމެ އެކަށީގެންވާ ފަރާތެކެވެ.
ލިބިފަައިވާ ތަޖުރިބާތަކަށް ބަލާއިރު، އޭނާ ފާހަގަކުރެވެނީ ގިނިކަންޏާ ޓީވީ ޗެނަލެއް ހިންގާ ފައްކާކުރެއްވި ކުޅަދާނަ ހިންގުންތެރިއެއް އަދި ނޫސްވެރިއެއްގެ ގޮތުގައެވެ. އަދި ފާހަގަކުރެވެނީ ސިޔާސީ ގޮތުން އެންމެ ހަލަބޮލި ވެގެންދާ ދަނޑިވަޅުތަކުގައި ވެސް ލީޑަރުން މީޑިޔާގެ ކުރިމައްޗަށް ގެންނަވާ ހޫނުގޮނޑީގައި ބައިތިއްބައިގެން ރައްޔިތުންނަށް ބޭނުންވާ ޚަބަރުތައް ތިލަކޮށްދެއްވި ވަރުގަދަ ޝަހުސިއްޔަތެއްގެ ގޮތުގައެވެ.
މީގެ އިތުރުން ޝިއުނާ ފާހަގަކުރެވެނީ ބަސްމޮށުންތެރިކަމަށް ކުޅަދާނަ މޮޅު ވާހަކަދެއްކުންތެރިއެއްގެ ގޮތުގައެވެ. ސިޔާސީ ޕޯޑިއަމްތަކަށް ނުހަނު ފަރިތަ މޮޅު ހުށަހެޅުންތެރިއެއްގެ ގޮތުގައެވެ. ޒަމާނީ ތަޢުލީމު ލިބިވަޑައިގެންފައިވާ އިންފޮމޭޝަން ޓެކްނޮލޮޖީއަށް ފަރިތަ ބޭފުޅެއްގެ ގޮތުގައެވެ. އެހެންކަމުން މަޤާމުގެ މަސްޢޫލިއްޔަތު އަދާކުރެވިދާނެކަމާ މެދު ސުވާލު އުފައްދަން ޖެހޭ އެއްވެސް ސަބަބެއް ނެތެވެ.
