“މިލައުތުރު ފުޓްސަލް ޗެލެންޖް 2023” ގެ ގުރޫޕް ބީ ގެ ނަވާރަވަނަ މެޗުގައި މިލަންދުއާއި ނަރުދޫ ބައްދަލުކުރި މެޗު 4 – 0 ގެ ނަތީޖާ އަކުން ކާމިޔާބުކޮށް ސައްތައިން ސައްތަ ރިކޯޑަކާއެކު މިލަންދޫން ގުރޫޕް ސުޓޭޖުގެ މެޗުތައް ނިންމާލައިފިއެވެ.

މާއުނގޫދޫ ގައި މިއަދު ހަވީރު 16:00 ގައި ފެށި މެޗުގައި ބޯކޮށް ވާރޭ ވެހެމުން ދިއުމުން ސަބަބުން 45 ވަރަކަށް މިނެޓް މެޗުގެ ކުޅުން މެދުކަނޑާލަންވެސް ޖެހުނެވެ. މެޗު މެދު ކަނޑާލި އިރު މެޗުގެ ފުރަތަމަ ހާފުގެ 10 ވަރަކަށް މިނެޓް ވަނީ ކުޅެވިފައެވެ. މެޗު މެދު ކަނޑާލި އިރު 1 – 0 ކުން ކުރީގައި އޮތީ މިލަންދޫ ޓީމެވެ. އެ ލަނޑު އެ ޓީމަށް ކާމިޔާބު ކޮށްދިނީ އިސްމާޢީލް ފަތުޙީ އެވެ.

ވިއްސާރަ ހުއްޓާލުމުން 17:00 ގައި މެޗުގެ ބާކީ ބައި ވަނީ ކުޅެފައެވެ. މި މެޗުގައި މިލަންދޫ ޓީމުން ޖެހި އިތުރު ލަނޑުތައް ކާމިޔާބު ކޮށްދީ ޢަލީ އީނާސް އާއި އިބްރާހިމް ޒާހީ އަދި އިސްމާޢީލް ފަތުޙީއެވެ. މެޗު އެއްކޮށް ކަހަލަ ގޮތަކަށް މޮޅަށް ކުޅެ ގިނަ ހަމާލާތައް އުފެއްދީ މިލަންދޫ ޓީމުންނެވެ.

މެޗުގެ މޮޅު ކުޅުންތެރިޔަކަށް ހޮވުނީ މިލަންދޫ ޓީމަށް މި މެޗުގައި ދެ ލަނޑު ކާމިޔާބު ކޮށްދިން ޖާޒީ ނަންބަރ 21 އިސްމާޢީލް ފަތުޙީއެވެ. މިލަންދޫ އިން މި މުބާރާތުގެ ކުއާރޓާފައިނަލްގައި ބައްދަލު ކުރާނީ ގުރޫޕް އޭގެ 4 ވަނަ ޓީމާއެވެ. މިމެޗުވެސް ކުޅުމަށް ހަމަޖެހިފައިވަނީ މާއުނގޫދޫ ފުޓްސަލްދަނޑުގައެވެ. މިމެޗުން ބަލިވި ނަމަވެސް ނަރުދޫވެސް ވަނީ ކުއާރޓާގެ ޖާގައެއް ކަށަވަރު ކޮށްފައެވެ. ނަރުދޫ އިން ބައްދަލު ކުރަން ޖެހޭނީ ގުރޫޕް އޭ ގެ 2 ވަނަ ޓީމު ކަމުގައިވާ ކަނޑިތީމާއެވެ.