ށ. އަތޮޅަށް ހުރިހާ ރަށަކަށް ހުޅުވާލެވިގެން ކުރިއަށް ގެންދާ މިލައުތުރު ފުޓްސަލް ޓޯނަމެންޓްގެ ގުރޫޕް ސްޓޭޖުގެ ކުޅުން ނިމި ކުއާޓާ ފައިނަލްގެ މެޗުތައް މާދަމާ (29 ނޮވެމްބަރު) ގައި ކުޅުމަށް ވަނީ ތައްޔާރުވެފައެވެ. ޖުމްލަ 14 ޓީމް ބައިވެރިވާ އަދި ގުރޫޕެއްގައި 7 ޓީމް ހިމެނޭ ގޮތަށް ދެ ގުރޫޕަކަށް ބަހާލައިގެން ކުރިއަށް ދިޔަ މެޗްތަށް ނިންމާލާފައި ވަނީ މިމަހުގެ 27 ވަނަ ދުވަހުއެވެ. ކުއާޓާ ފައިނަލް ގައި 8 ޓީމަކުން ވާދަ ކުރާނެއެވެ.
ކުއާޓާ ފައިނަލަށް ގޮސްފައިވާ ޓީމްތަކުގެ ތެރޭގައި ގުރޫޕް އޭ ގެ ހަތަރު ޓީމެއް އަދި ގުރޫޕް ބީ ގެ ހަތަރު ޓީމެއް ހިމެނެއެވެ. ގުރޫޕް އޭ އިން ކުއާޓާ ފައިނަލަށް ދަތުރު ކޮށްފައި ވަނީ ފޯކައިދޫ، ކަނޑިތީމު، ގޮއިދޫ އަދި ފޭދޫއެވެ. ގުރޫޕް ސްޓޭޖު ގައި 6 މެޗު ކުޅެ 16 ޕޮއިންޓާއި އެކު ފޯކައިދޫ ކުއާޓާ ފައިނަލަށް ދަތުރު ކުރި އިރު ކަނޑިތީމު ކުއާޓާ އަށް ގޮސްފައި ވަނީ ގުރޫޕް ސްޓޭޖު ގައި 13 ޕޮއިންޓް ހޯދައިގެންނެވެ. 10 ޕޮއިންޓާ އެކު ގޮއިދޫ ކުއާޓާގައި ވާދަކުރާ އިރު ފޭދޫ ކުއާޓާއަށް ގޮސްފައި ވަނީ ޕޮއިންޓުގެ ގޮތުން ބިލެތްފަހި ޓީމާއި އެއްވަރުވެ ގޯލުގެ ގޮތުން ކުރި ހޯދައިގެންނެވެ.
ގުރޫޕް ބީ އިން ކުއާޓާ ފައިނަލްގައި ވާދަ ކުރާ ޓީމު ތަކުގެ ތެރޭގައި ހިމެނެނީ މިލަންދޫ، ފުނަދޫ، ޅައިމަގު އަދި ނަރުދޫ އެވެ. 18 ޕޮއިންޓާ އެކު މިލަންދޫ ކުއާޓާ ފައިނަލަށް ދަތުރު ކޮޮށްފައިވާ އިރު ފުނަދޫއަށް ލިބިފައިވަނީ 13 ޕޮއިންޓެވެ. އަދި ޅައިމަގު 10 ޕޮއިންޓާ އެކު ކުއާޓާއަށް ދަތުރު ކޮށްފައިވާ އިރު ނަރުދޫއަށް ކުއާޓާ އިން ޖާގަ ލިބިފައިވަނީ 8 ޕޮއިންޓު ހޯދައިގެނެވެ، ކުއާޓާ ފައިނަލްގެ މެޗުތަށް ވެސް ކުޅެން ހަމަ ޖެހިފައިވަނީ ގުރޫޕް ސްޓޭޖާއި އެއްގޮތަށް މުބާރާތް ހޯސްޓް ކުރާ ދެ ރަށަށް ބަހާލައިގެންނެވެ.
ކުއާޓާ ފައިނަލްގެ ފުރަތަމަ މެޗުގައި ފޯކައިދޫ އަދި ނަރުދޫ މިއަދު ހަވީރުި ގޮއިދޫ ދަނޑު ގައި ކުޅެން ހަމަ ޖެހިފައިވާ އިރު މިލަންދޫ އަދި ފޭދޫ ބައްދަލު ކުރާ މެޗު މާއުނގޫދުގައި ކުޅޭ ގޮތަށް ވަނީ ހަމަޖެހިފައެވެ. މި ދެ މެޗުގެ ކުޅުން ފެށުމަށް ތާވަލު ކޮށްފައިވަނީ 16:00 ގައެވެ. 17:00 ގަ ކުޅުން ފަށަން ހަމަޖެހިފައިވާ މެޗްތަކުގެ ތެރޭގައި ހިމެނެނީ ގޮއިދޫ އަދި ފުނަދޫ ބައްދަލު ކުރާ މެޗުގެ އިތުރުން ކަނޑިތީމު އަދި ޅައިމަގު ބައްދަލު ކުރާ މެޗެވެ. ގޮއިދޫ ޓީމް މި މެޗް ވެސް އަމިއްލަ ދަނޑުގައި ކުޅެން ހަމަ ޖެހިފައިފައިވާ އިރު ކަނޑިތީމު އަދި ޅައިމަގު ބައްދަލު ކުރާ މެޗު ކުޅުމަށް ހަމަޖެހިފައި ވަނީ މާއުނގޫދޫގައެވެ.
