“މިލައުތުރު ފުޓްސަލް މުބާރާތް 2023” ކުއާރޓާފައިނަލުގައި މިލަންދޫއާއި ފޭދޫ ބައްދަލުކުރި މެޗު ތަފާތު ބޮޑު ނަތީޖާއަކުން މިލަންދޫން ކާމިޔާބުކުރި އިރު ޅައިމަގު ކައިރިން ކަނޑިތީމަށް ސަލާމަތް ވެވުނީ ކިރިޔާ އެވެ.

މިއަދު ހަވީރު މާއުނގޫދޫގައި ކުޅުނު މެޗު މިލަންދޫން ކާމިޔާބު ކުރީ 7 – 1 ގެ ތަފާތު ބޮޑު ނަތީޖާއަކުންނެވެ. މި މުބާރާތުގެ މޮޅުކުޅުމެއް ދައްކަމުންދާ މިލަންދޫ ޓީމުގެ ފަރާތުން މޮޅު ކުޅުމެއް ފެނިގެންދިޔަ މެޗުގައި ފުރަތަމަ ލަނޑުޖަހައި ކުރި ހޯދީ މިލަންދޫ ޓީމުންނެވެ. މިލަނޑު އެ ޓީމަށް ޖަހައިދިނީ އަޙްމަދު ޝާނީ އެވެ. ފުރަތަމަ ހާފުގެ 8 ވަނަ މިނެޓުގައި އަޙްމަދު ޝާނީ ވަނީ އިތުރު ލަނޑެއްޖަހައި މިލަންދޫގެ ލީޑު ފުޅޮށްފައެވެ. މެޗުގެ 9 ވަނަ މިނެޓުގައި ފޭދޫ ޓީމުގެ މާޒިލް މުޙައްމަދު ލަނޑެއްޖަހައި ފަރަގު ކުޑަ ކުރިއެވެ. މިއީ މި މުބާރާތުގައި މިހާތަނަށް މިލަންދޫ ކޮޅަށް ވަތް ހަމައެކަނި ގޯލެވެ. ފުރަތަމަ ހާފު ނިމުމުގެ ކުރިން މިލަންދޫގެ އިބްރާހިމް ޒާހީ އަދި އިބްރާހިމް ސަޢީދު ވަނީ އިތުރު ލަނޑުތަކެއް ކާމިޔާބު ކޮށްދީ ފައެވެ. މިލަނޑު ތަކާއި އެކު ފުރަތަމަ ހާފު ނިމުނީ 4-1 ން މިލަންދޫ ކުރީގައި އޮވެގެންނެވެ.
ދެވަނަ ހާފުގައިވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ މިލަންދޫ ޓީމުންނެވެ. މި ހާފުގައި މިލަންދޫ ޓީމުން ވަނީ އިތުރު ތިން ލަނޑު ޖަހާފައެވެ. އޭގެތެރެއިން ދެލަނޑު ޖަހައިދިނީ އިސްމާޢީލް ފަތުޙީއެވެ. އަނެއް ލަނޑު ޖަހައިދިނީ އިބްރާހިމް ޒާހީއެވެ. މި މެޗުގެ މޮޅު ކުޅުންތެރިޔަކަށް ހޮވުނީ މިލަންދޫ ޓީމުގެ ޖާޒީ ނަންބަރ 30 އަޙްމަދު ޝާނީ އެވެ.

މާއުނގޫދޫގައި ކުޅެވުނު ކުއާރޓާފައިނަލުގެ ދެވަނަ މެޗުގައި ޅައިމަގު ކައިރިން ކަނޑިތީމަށް ސަލާމަތް ވެވުނީ ހަމަ ކިރިޔާ އެވެ. މިމެޗު ނިމުނީ 3 – 2 ގެ ނަތީޖާ އަކުންނެވެ. ދެޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔަ މެޗުގައި ފުރަތަމަ ގޯލު ޖަހައި ކުރި ހޯދީ ޅައިމަގު ޓީމުންނެވެ. މިލަނޑު އެ ޓީމަށް ކާމިޔާބު ކޮށްދިނީ ލިބުނު ޕެނަލްޓީއަކުން ޢަބްދުލްކަރީމް އަޙްމަދެވެ. މިއީ ކަނޑިތީމު ޕެނަލްޓީ އޭރިޔާ ތެރެއިން ޅައިމަގު ޓީމުގެ ޖާޒީ ނަންބަރ 9 ވައްޓާލުމާއި ގުޅިގެން ލިބުނު ޕެނަލްޓީއެކެވެ. ފުރަތަމަ ހާފު ނިމުމުގެ ކުރިން ކަނޑިތީމުގެ ޖާޒީ ނަންބަރ 7 އިބްރާހިމް ނަދާދު ލަނޑެއްޖަހައި ނަތީޖާ ހަމަހަމަ ކުރިއެވެ.
ދެވަނަ ހާފު ފެށިގެން ދެ ޓީމުންވެސް ނުރައްކާތެރި ހަމާލާތައް އުފައްދަމުން ދިޔައެވެ. ދެވަނަ ހާފުގެ 12 ވަނަ މިނެޓް ގައި ޅައިމަގު ޓީމުގެ އާދަމް ރީހާނު ލަނޑެއްޖަހައި ލީޑު ނެގިއެވެ. ނަމަވެސް އޭގެ 4 މިނެޓް ފަހުން ކަނޑިތީމުގެ މުޙައްމަދު ޝާން ލަނޑެއްޖަހައި ނަތީޖާ ހަމަ ހަމަ ކުރިއެވެ. މެޗު ނިމެން 2 މިނެޓަށް ވެފައިވަނިކޮށް ކަނޑިތީމުގެ އިބްރާހިމް ނަދާދު ލަނޑެއް ޖަހައި މެޗުގެ ނަތީޖާ އަނބުރާލިއެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ މެޗުގައި މޮޅުކުޅުމެއް ދައްކައި ކަނޑިތީމަށް ދެލަނޑު ކާމިޔާބު ކޮށްދިން އިބްރާހިމް ނަދާދެވެ.

ސެމީ ފައިނަލް ގައި މިލަންދޫ އާއި ދެކޮޅަށް ކަނޑިތީމުން ނުކުންނަ އިރު މިމެޗުކުޅުމަށް ހަމަޖެހިފައިވަނީ 01 ޑިސެމްބަރ 2023 ވާ ހުކުރު ދުވަހު ހަވީރު މާއުނގޫދޫ ފުޓްސަލްދަނޑުގައެވެ.