ޑރ. މުޙައްމަދު މުޢިއްޒު ރައީސުލްޖުމްހޫރިއްޔާގެ މަޤާމުގެ ހުވާ ކުރެއްވީ 17 ނޮވެމްބަރ 2023 ގައެވެ. އެހެންކަމުން އެމަނިކުފާނުގެ ސަރުކާރަށް ހަފުތާއެއް ފަހަނަ އަޅައިފިއެވެ. އެހެން ނަމަވެސް ސަރުކާރުގެ އިދާރާތަކުގެ އިސް މަޤާމުތަކަށް މީހުން އައްޔަންކޮށް ވެސް އަދި ނުނިމެއެވެ. ބައެއް އޮފީސްތަކާ ކުންފުނިތައް އަދިވެސް ހިންގަވަނީ ރައީސް އިބްރާހީމް މުޙައްމަދު ޞާލިޙް އައްޔަންކުރައްވާފައި ތިއްބެވި ވެރިންނެވެ.
ފުރަތަމަ ހަފުތާގެ ތެރޭގައި އެންމެ ފާހަގަކޮށްލެވޭ ކަމަކީ ވެރިކަންކުރާ ކޯލިޝަންގެ އެންމެ އިސް ލީޑަރު ޕާޓީ ދޫކުރައްވާ އެހެން ޕާޓީއެއް އުފައްދަވަން ނިކުންނެވުމެވެ. ޑރ. މުޢިއްޒު ރިޔާސީ އިންތިޚާބަށް ނިކުންނެވީ ޕީޕީއެމް/ޕީއެންސީ ކޯލިޝަންގައެވެ. އަދި ރިޔާސީ ޓިކެޓް ލިބިވަޑައިގަތީ ކުރީގެ ރައީސް ޢަބްދު ﷲ ޔާމީން ޢަބްދުލް ޤައްޔޫމަށް ވާދަކުރެއްވުމުގެ ފުރުޞަތު ގެއްލުމުން ދެވަނަ އޮޕްޝަނެއްގެ ގޮތުގައެވެ. އަދި މުޅި ކެމްޕެއިން ބިނާކުރެއްވީ ރައީސް ޔާމީން މިނިވަންކުރެއްވުމުގެ މައްޗަށެވެ. އެހެން ނަމަވެސް ވެރިކަމަށް އެންމެ 7 ދުވަސް ވީތަނާ ދެބޭފުޅުންގެ ގުޅުން ކެނޑިއްޖެއެވެ.
އިތުރަށް ފާހަގަކޮށްލެވޭ އަނެއް ކަމަކީ ޑރ. މުޢިއްޒު ސިޔާސީ މަޤާމުތަކަށް އައްޔަންކުރައްވާ ބައެއް ބޭފުޅުން ތިން ހަތަރު ދުވަސް ތެރޭގައި ވަކިކުރައްވަން ޖެހިވަޑައިގަތުމެވެ. ސްޓޭޓް މިނިސްޓަރުންނާއި ނައިބުންނާއި، ބޯޑުތަކަށް އައްޔަން ކުރެއްވި ބައެއް ބޭފުޅުން އައްޔަންކުރެއްވިތާ 3 ދުވަސް ނުވަނީސް ވެސް ވަކިކުރައްވާފައި ވެއެވެ. މިއީ ރާއްޖޭގެ ތާރީޚުގައި ވެސް އެންމެ ހަލަބޮލި ފެށުމަކަށް ވެގެންދާނެއެވެ. އަދި ރައްޔިތުންގެ މަޖިލިސްގައި ސަރުކާރެއް އެންމެ ނިކަމެތިވެފައި އޮތް ފަހަރެއް ވެސް މެއެވެ. އެހެނީ ސަރުކާރު ތަމްސީލުކުރައްވަން މިވަގުތު މަޖިލިސްގައި ހުންނެވީ ހަމަ އެންމެ މެމްބަރެކެވެ.
