“މިލައުތުރު ފުޓްސަލް މުބާރާތް 2023” ސެމީފައިނަލްގައި ކަނޑިތީމާއި މިލަންދޫ ބައްދަލުކުރި މެޗު ކާމިޔާބުކޮށް ކަނޑިތީމު ފައިނަލަށް ދަތުރު ކޮށްފިއެވެ.

މިއަދު ހަވީރު މާއުނގޫދޫގައި ކުޅުނު މެޗު ކަނޑިތީމުން ކާމިޔާބު ކުރީ 2 – 1 ނަތީޖާއަކުންނެވެ. ފޯރިގަދަ ކުޅުމެއް ފެނިގެން ދިޔަ މެޗުގައި ފުރަތަމަ ލަނޑުޖަހައި ކުރި ހޯދީ ކަނޑިތީމުންނެވެ. މިލަނޑު އެ ޓީމަށް ކާމިޔާބު ކޮށްދިނީ ލިބުނު ދުރު ޕެނަލްޓީއަކުން އެ ޓީމުގެ ޖާޒީ ނަންބަރ 80 މުޙައްމަދު ޝާން އެވެ. އޭގެ ކުރިން މިލަންދޫއަށް ލިބުނު ދުރު ޕެނަލްޓީ ވަނީ ކަނޑިތީމު ކީޕަރު ހުށިއާރުކަމާއެކު މަތަކޮށްފައެވެ. ފުރަތަމަ ހާފު ނިމުނީ ކަނޑިތީމު ކުރީގައި އޮވެގެންނެވެ.

ދެވަނަ ހާފު ފަށައިގެން މިލަންދޫ ޓީމުން ކަނޑިތީމު ގޯލަށް ނުރައްކާ ކުރަމުން ދިޔައެވެ. ނަތީޖާއެއްގެގޮތުން ދެވަނަ ހާފުގެ 7 ވަނަ މިނެޓުގައި މިލަންދޫ އަށް ލިބުނު ކޯނަރެއްގައި އޭރިޔާ ކުރިމައްޗަށް ހުރަސްވި ބޯޅަ އެޓީމުގެ އިބްރާހިމް ޒާހީ ގޯލުގެ ދުރު ކަނަށް ފޮނުވާލައިގެން ނަތީޖާ ހަމަހަމަ ކޮށްދިނެވެ. އޭގެ ފަހުންވެސް މިލަންދޫ އަށް ލަނޑުޖަހާނެ ރަނގަޅު ފުރުޞަތުތަކެއް ލިބިގެން ދިޔައެވެ. މި ފުރުޞަތުތަކުގެ ހުރަހަކަށްވީ މި މެޗުގައި މޮޅު ކުޅުމެއް ދެއްކި ކަނޑިތީމު ގޯލްކީޕަރު އިބްރާހިމް ޒަމީނެވެ. އޭނާވަނީ ދެވަނަ ހާފުގައި މިލަންދޫ އަށް ލިބުނު ދެ ދުރު ޕެނަލްޓީވެސް މަތަކޮށްފައެވެ.

މެޗު ނިމެން 2 މިނެޓަށް ވެފައި ވަނިކޮށް މިލަންދޫ ޓީމުގެ ސިޔާމް ކުރި ފައުލަކާއި އެކު ފަސް ފައުލު ހަމަ ވެގެން ކަނޑިތީމު ޓީމަށް ލިބުނު ދުރު ޕެނަލްޓީ ކާމިޔާބުކޮށް ކަނޑިތީމަށް ލީޑު ނަގައިދިނީ ފުރަތަމަ ލަނޑުވެސް ކާމިޔާބުކޮށްދިން މުޙައްމަދު ޝާން އެވެ.

މެޗުގެ ފަހު ހާފުގައި ރެފްރީންގެ ނިންމުންތަކާއި މެދު ހިތްހަމަނުޖެހުން ފާޅު ކުރުމުން ކަނޑިތީމުގެ އޮފިޝަލަކަށް ވަނީ ރަތް ކާޑެއްވެސް ދައްކާފައެވެ. އަދި ދަނޑުބޭރުން ދެޓީމުގެ ސަޕޯޓަރުންގެ މެދުގައި ހަމަނުޖެހުމެއް ހިނގާފައިވެއެވެ. އެކަން ފުލުހުން ވަނީ ކޮންޓުރޯލް ކޮށްފައެވެ. ދެޓީމުގެވެސް ގިނަ އަދަދެއްގެ ސަޕޯޓަރުން މި މެޗަށް މާއުނގޫދޫ އަށް އައިސްފައިވާކަން ފާހަގަކުރެވެއެވެ. މިއީ މި މުބާރާތުގައި މިލަންދޫ ޓީމު ހަމައެކަނި ބަލިވި މެޗު ކަން ފާހަގަކޮށްލެވެއެވެ.

މެޗުގެ މޮޅު ކުޅުންތެރިޔަކަށް ހޮވުނީ ކަނޑިތީމު ޓީމުގެ ގޯލްކީޕަރު އިބްރާހިމް ޒަމީނެވެ. ފައިނަލް ގައި ކަނޑިތީމުން ނުކުންނާނީ ފައިނަލްމެޗު ބާއްވާ ގޮއިދުއާއި ދެކޮޅަށެވެ. މިމެޗުކުޅުމަށް ހަމަޖެހިފައިވަނީ 03 ޑިސެމްބަރ 2023 ވާ އާދީއްތަ ދުވަހު ހަވީރު ގޮއިދޫ ފުޓްސަލްދަނޑުގައެވެ.