ށ. އަތޮޅުގެ ހުރިހާ ރަށަކަށް ހުޅުވައިލެވިގެން ކުރިއަށް ގެންދިޔަ މިލައުތުރު ފުޓްސަލް ޖެލެނެޖް 2023 ކާމިޔާބު ކަމާއި އެކު ނިންމާލައިފިއެވެ. މުބާރާތުގެ ފައިނަލް މެޗް މިއަދު ހަވީރު ކުޅެފައިވާ އިރު މި މެޗު ގައި ވާދަ ކޮށްފައި ވަނީ މުބާރާތް ބާއްވާ ރަށް ކަމުގައިވާ ގޮއިދޫ އަދީ ކަނޑިތީމެވެ. ކުލަ ގަދަ ހަފްލާ އަކާއި އެކު ފެށުނު މި މެޗު 2-3 ގެ ނަތީޖާ އަކުން މެޗު ކާމިޔާބު ކޮށް މުބާރާތުގެ ފަޙުރުވެރި ޗެމްޕިއަން ކަން ހޯދައިފައި ވަނީ ކަނޑިތީމު ޓީމެވެ.

ށ. އަތޮޅުގެ ޕޮލިސް ކޮމާންޑަރ ޗީފް އިންސްޕެކްޓަރ އޮފް ޕޮލިސް  މުޙައްމަދު އަބްދުﷲ ޝަރަފުވެރި ކޮށްދިން މި މެޗުގައި ދެ ޓީމުން ވެސް ވަނީ ވާދަވެރި މޮޅު ކުޅުމެއް ދައްކައިފަ އެވެ. ދެ ޓީމުގެ ގިނަ އަދަދެއްގެ ސަޕޯޓަރުން މެޗް ބަލަން ހާޒިރުވެ ތިބި މި މެޗުގެ ފުރަތަމަ ލަނޑު ޖަހައި ކުރި ހޯދީ ކަނޑިތީމު ޓީމުންނެވެ. އެ ޓީމަށް މި ލަނޑު ކާމިޔާބު ކޮށްދީފައި ވަނީ އެ ޓީމުގެ ޖާޒީ ނަންބަރު 7، އިބްރާހިމް ނަދާދު އެވެ. މި ނަތީޖާ އާއި އެކު ފުރަތަމަ ހާފުގެ ކުޅުން ނިންމާލާފައި ވަނީ ކަނޑިތީމު ކުރީގައި އޮވެގެންނެވެ.

ދެވަނަ ހާފު ފެށި މާ އިރު ތަކެއް ނުވެ ގޮއިދޫ ޓީމު އިން ވަނީ ލަނޑެއް ޖަހައި މެޗުގެ ނަތީޖާ ހަމަހަމަ ކޮށް މެޗުގެ ފޯރި ގަދަކޮށްފައެވެ. މި ލަނޑު ގޮއިދޫ އަށް ކާމިޔާބު ކޮށްދީފައިވަނީ ލިބުނު ހިލޭ ޖެހުމަކުން އެ ޓީމުގެ ޖާޒީ ނަންބަރު 31، މުޙައްމަދު މިސްބާޙް އެވެ. ނަތީޖާ ހަމަހަމަ ކޮށްދިން މި ލަނޑު ގޮއިދޫ ޓީމުން ޖަހައި އެ ޓީމަށް ހަމަޖެހި ނުލެވެނިސް ކަނޑިތީމު ޓީމުން ވަނީ އެ ޓީމުގެ ދެ ވަނަ ލަނޑު ޖަހައި ދެވަނަ ފަހަރަށް މެޗުގެ ކުރި ހޯދައިފަ އެވެ. މި ލަނޑު ކަނޑިތީމު ޓީމަށް ކާމިޔާބު ކޮށްދީފައި ވަނީ އެ ޓީމުގެ ޖާޒީ ނަންބަރު 15، އާދަމް ތައުފީޤު އެވެ. ކަނޑިތީމުން ދެވަނަ ފަހަރަށް ކުރި ހޯދައިފައި ވަނިކޮށް ގޮއިދޫ ޓީމުގެ ޖާޒީ ނަންބަރު 19، މުޙައްމަދު އަހުސަމް ވަނީ ގޮއިދޫ ޓީމަށް ލަނޑެއް ކާމިޔާބު ކޮށްދީ މެޗުގެ ނަތީޖާ ހަމަ ކޮށްދީފައެވެ. ކަނޑިތީމު ޓީމަށް އެ ޓީމުގެ 3 ވަނަ ލަނޑު ޖަހައިދީފައި ވަނީ މެޗުގެ ފަހު ސިކުންތު ކޮޅުގެ ތެރޭގައި އިބްރާހިމް ނަދާދު އެެވެ. ފައިނަލް މެޗުގެ މޮޅު ކުޅުންތެރިއަކަށް ހޮވިފައި ވަނީ ކަނޑިތީމުގެ ޖާޒީ ނަންބަރު 7، އިބްރާހިމް ނަދާދްއެވެ. ގޮއިދޫ އަދި ކަނޑިތީމު މި ދެ ޓީމަކީ ކުޅިވަރުގައި ތާރީޙީ ވާދަވެރި ކަމެއް އޮންނަ 2 ޓީމު ކަންވެސް ފާހަގަ ކޮށްލެވެ.

މި 2 ޓީމުން ވަނީ މީގެ ކުރިން ވެސް މި މުބާރާތުގެ ގުރޫޕް ސްޓޭޖު ގައި ވާދަ ކޮށްފައެވެ. ގުރޫޕް ސްޓޭޖުގައި މި 2 ޓީމު ބައްދަލު ކުރި މެޗް 1-0 ގެ ނަތީޖާ އަކުން ކާމިޔާބު ކޮށްފައި ވަނީ ކަނޑިތީމުންނެވެ. ޒަމާނީ ވާދަވެރިކަމެއް އޮންނަ ގޮއިދޫ އާއި ވާދަ ކޮށް ކަނޑިތީމު ޓީމުން މި ހޯދި ކާމިޔާބީ އަކީ އެ ރަށަށް ލިބުނު ބޮޑު ފަހުރެކެވެ. ކަނޑިތީމު ފައިނަލާ ހަމައަށް ދަތުރު ކޮށްފައި ވަނީ މުބާރާތުގެ ގުރޫޕް ސްޓޭޖް ގައި ޖުމްލަ 6 މެޗް ކުޅެ، 4 މެޗް ކާމިޔާބު ކޮށް، 1 މެޗުން ބަލިވެ އަދި 1 މެޗު ހަމަހަމަ ނަތީޖާ އަކުން ނިންމާލުމަށް ފަހު ގްރޫޕް ސްޓޭޖު ގެ ދެ ވަނައިގައި 13 ޕޮއިންޓާއި އެކު އޮވެ ކުއާޓާ ފައިނަލްގެ ޖާގައެއް ކަށަވަރު ކުރުމަށް ފަހުގައެވެ. ކުއާޓާ ފައިނަލް ގައި ޅައިމަގު އާއި ބައްދަލު ކޮށް 3-2 ގެ ނަތީޖާ އަކުން މެޗު ކާމިޔާބު ކުރުމަށް ފަހު ސެމީ ފައިނަލް ގައި މިލަންދޫ ޓީމު 2-1 ގެ ނަތީޖާ އަކުން ބަލި ކުރުމަށް ފަހުގަ އެވެ. މި މެޗަށް ކަނޑިތީމު ނިކުމެފައިވަނީ އެ ޓީމަށް މުހިންމު ދެ ކުޅުންތެރިން ކަމުގައިވާ އެ ޓީމުގެ މުޙައްމަދު ނާފިއު އަދި ޖާޒީ ނަންބަރު 80، މުޙައްމަދު ޝާން ސަސްޕެންޝަނު ގައި ވަނިކޮށެވެ.

މި އަހަރުގެ މިލައުތުރު ފުޓްސަލް ޓޯނަމެންޓް އިންތިޒާމު ކޮށްފައި ވަނީ މާއުނގޫދޫ ކަައުންސިލާއި ގޮއިދޫ ކައުންސިލްގެ އެހީގައި ށ. އަތޮޅު ކައުންސިލްގެ ފުރިހަމަ ސްޕޮންސަރ އާއި އެކުގަ އެވެ. ކޯ ސްޕޮންސަރުންގެ ތެރޭގައި ބޭންކް އޮފް މޯލްޑިވްސް، އައިލެންޑް އެޕަރަލް ހިމެނޭ އިރު އޮފިޝަލް މީޑިއާ ޕާޓްނަރުންގެ ގޮތުގައި ހަރަކާތްތެރި ވެފައި ވަނީ ފަހު މިނެޓް އަދި މިލައުތުރު އޮންލައިން އެވެ. އަދި މި މުބާރާތުގެ ފައިނަލް މެޗު ވަނީ ވީޓީވީ އިން ވަގުތުން ދުރަށް ދަައްކާފައެވެ.