ލ. އިސްދޫ ކައުންސިލުން އިންތިޒާމްކުރާ ފުޓްބޯޅަ މުބާރާތް އިއްޔެ އިސްދޫގައި ފެށިއްޖެއެވެ. އަތޮޅުގެ 4 ރަށަކުން 5 ޓީމް ބައިވެރިވާ މި މުބާރާތް ފެށުމުގެ ރަސްމިއްޔާތު ޝަރަފުވެރި ކޮށްދެއްވީ އިސްދޫ ކައުންސިލްގެ ރައީސް އިބްރާހީމް ޚަލީލްއެވެ.

މިއީ ކޮންމެ އަހަރަކު ވެސް އިސްދޫ ކައުންސިލުން ބާއްވަމުން އަންނަ އަތޮޅުގައި ބޭއްވޭ މިފަދަ އެންމެ ބޮޑު ފުޓްބޯޅަ މުބާރާތެވެ. ކޮންމެ އަހަރަކު ވެސް މި މުބާރާތައް ބޮޑު ތަރުޙީބެއް ލިބެއެވެ. މިއަހަރުގެ މުބާރާތް ސްޕޮންސަރ ކޮށްފައި ވަނީ ޢަބްދު ﷲ ފަޔާޒްއެވެ.

މުބާރާތް ހުޅުވުމުގެ މެޗްގައި ފޯރިގަދަ ކުޅުމަކަށް ފަހު ކްލަބް ނާރެސް ބަލިކޮށް 4 – 1 ގެ ނަތީޖާއަކުން މެޗް ކާމިޔާބުކުރީ ކްލަބް ބެސްޓްއެވެ. މެޗްގެ މޮޅު ކުޅުންތެރިއަކަށް ހޮވުނީ ކްލަބް ބެސްޓްގެ ޖާޒީ ނަންބަރު 7 ހަނީފްއެވެ.

މި މުބާރާތުގައި ބައިވެރި ވަނީ ދަނބިދޫ ކައުންސިލް އާއި، ކްލަބް ނާރެސް އާއި، ބީންގ އެންކަރޭޖިންގ ސޮސައިޓީ އާއި، އައިލޭންޑް ޔޫތް ޔުނައިޓެޑްގެ އިތުރުން އިސްދޫ ޔޫތް ސޮސައިޓީއެވެ.