އިންޑިޔާ ސިފައިންނާ ގުޅޭގޮތުން ޑރ. މުޢިއްޒާ ޕީޕީއެމް/ޕީއެންސީގެ ވެރިން ދެއްކި ވާހަކަތައް ސާބިތުކޮށް ނުދެވިއްޖެ ނަމަ ރައީސްގެ މައްޗަށް އިތުބާރު ނެތްކަމުގެ މައްސަލައެއް ހުށަހަޅަން ޖެހިދާނެ ކަމަށް ކަނޑިތީމް ދާއިރާގެ ޢިއްޒަތްތެރި މެމްބަރު ޢަބްދު ﷲ ޝަހީމް ވިދާޅުވެއްޖެއެވެ.
ޝަހީމް މިހެން ވިދާޅުވެ ވާހަކަދެއްކެވީ މިސަރުކާރުގެ ވެރިން ދޮގު ވާހަކަތައް ފެތުރިކަމަށް ބުނެ ހުށަހަޅާފައިވާ ކުއްލި މައްސަލައިގެ ބަހުސްގައި ވާހަކަފުޅު ދައްކަވަމުންނެވެ. ޑރ. މުޢިއްޒުގެ ރިޔާސީ ކެމްޕެއިންގައި އިންޑިޔާ ސިފައިން ޤާއިމްވެ ތިބިކަމަށާއި ރާއްޖޭގެ މިނިވަންކަމާ އިސްތިޤްލާލަށް ނުރައްކާވެފައި ވާކަމަށް ވިދާޅުވެފައި ވެއެވެ. ރައްޔިތުން ވޯޓް ދިނީ އެވާހަކަތަކަށް ބަލާފައި ކަމަށާއި، އެފަދަ ކަމެއް އަދިވެސް ސާބިތުކޮށްދެވިފައި ނެތުމަކީ ދޮގު ވާހަކަތައް ފެތުރިކަމުގެ ފުރިހަމަ ދަލީލެއް ކަމަށެވެ.
އިންޑިޔާ ސިފައިންނަކީ ދިމާވި ކޮންމެކަމެއްގައި ދިވެހިރާއްޖެއަށް އެންމެ އަވަހަށް އެންމެ ބޮޑު އެހީތެރިކަމެއް ވެދޭ ބަޔަކަށް ވެފައި، އެމީހުންނާ ގުޅޭގޮތުން ދޮގު ބުހުތާނު ވާހަކަތައް ފެތުރުމަކީ ތަޙްޤީޤްކުރަން ޖެހޭކަމެއް ކަމަށެވެ. އަދި ވެރިކަމަށް އަރާފައި މިހާރު ދައްކަވާ ވާހަކަފުޅުތައް ދެކޮޅު ނުޖެހޭކަމަށެވެ.
އަދި ހާހުން ދޮޅުހާހުން ތިބިކަމަށް ވިދާޅުވި އިންޑިޔާ ސިފައިންެގެ ޢަދަދު 77 ން 89 މިހެން ބަދަލުވަމުން ގޮސް ޙަޤީޤަތް އޮޅިއްޖެކަމަށާއި، މުޢިއްޒު ހުންނެވި ހިސާބު ވެސް މިހާރު އޮޅިއްޖެ ކަމަށެވެ. މިހެން ދާންވެއްޖެ ނަމަ މިޤައުމު ބޮޑު އަނދަވަޅަކަށް ވެއްޓިދާނެކަމަށާ އޭގެ ކުރިން ޑރ. މުޢިއްޒު މަޤާމުން ދުރުކުރަން ޖެހިދާނެކަމުގެ އިންޒާރު ދެއްވާފައި ވެއެވެ.
