ށ. އަތޮޅު ކައުންސިލްގެ މިދައުރުގެ ރައީސް މުޙައްމަދު ޝިޔާމް (ޝިޔަންޓޭ) 2024 ވަނަ އަހަރު އޮންނަ ރައްޔިތުންގެ މަޖިލިސް އިންތިޚާބުގައި މިލަންދޫ ދާއިރާގެ ޕީޕީއެމް ޕީއެންސީ ޕްރައިމަރީގައި ވާދަކުރައްވާނެކަން ވަނީ އިޢުލާން ކުރައްވާފައެވެ.
ޝިޔަންޓޭ ވާދަކުރައްވާ ނަމަ މިލަންދޫ ދާއިރާގެ މަޖިލިސް ޕްރައިމަރީ ގަދަ ހިފުމަކަށް ދާންޖެހޭނެކަން އެއީ މުޖައްރިބު ކަމެކެވެ. އެހެނީ ޝިޔަންޓޭ އަކީ ކުޑައެއް ބޮޑެއް ވަކި ޕާޓީއެއް ބެލުމެއް ނެތި އެންމެންނާ ވެސް ގުޅޭ ވަރަށް ހިތްތިރި މަޖާ މިޒާޖެއްގެ މީހެކެވެ. އަތޮޅުގެ ގިނަ ބައެއްގެ ލޯތްބާއި އިޙްތިރާމް ލިބިފައިވާ ފަރާތެކެވެ.
އެމްޑީޕީގެ ޓިކެޓްގައި އަތޮޅު ކައުންސިލަށް އިންތިޚާބުވުމަށް ފަހު މިހާރު ވަނީ ސަރުކާރު ހިންގާ ކޯލިޝަނާ ހުޅިވަޑައިގެންފައެވެ. އަދި އެފަހަރު އެމްޑީޕީ ޕްރައިމަރީ ކާމިޔާބުކުރެއްވީ އަތޮޅު ތަމްސީލްކުރައްވަން ތިއްބެވި ރައްޔިތުންގެ މަޖިލިސްގެ ހަތަރު މެމްބަރުންނާ ވެސް ދެކޮޅަށެވެ. މެމްބަރުން ތާޢީދުކުރެއްވީ މިހާރުގެ ކޮމަންޑޫ ދާއިރާގެ މެމްބަރު މުޙައްމަދު ރާޝިދު (ރާޑޯ) އަށެވެ.
މިލަންދޫ ދާއިރާގެ ޕީޕީއެމް ޕީއެންސީ ޕްރައިމަރީގައި ޝިޔަންޓޭގެ އިތުރުން ކުރީގެ މެމްބަރު ހަސަނާ އާއި ނަބީލް ޒަމީލް ވެސް ވާދަކުރައްވާނެކަން ވަނީ ރަސްމީކޮށް އިޢުލާންކުރައްވާފައެވެ.
