ވެރިކަންކުރާ ކޯލިޝަންކަމުގައިވާ ޕީޕީއެމް-ޕީއެންސީގެ މަޖިލިސް ޕްރައިމަރީގައި ވާދަކުރަން ތިބި މީހުންގެ ވާދަވެރިކަން ބޮޑުވެފައި ވަނިކޮށް އިންތިޚާބު ވާއްވާ ތާރީޚް އަވަސްކޮށް 23 ޑިސެމްބަރުގައި ބާއްވާގޮތަށް ހަމަޖައްސައިފި ކަމުގެ މަޢުލޫމާތު ލިބިއްޖެއެވެ.
ޕާޓީއަށް އެންމެ ދޮށީ އަދި ޚިދުމަތްތެރީ ކާކުތޯ ކުރެވޭ ބަހުސް މެންބަރުންގެ މެދުގައި ވަނީ ވަރަށް ބޮޑަށް ހޫނުވެފައެވެ. އަދި ގިނަ ބަޔަކަށް ޤަބޫލުކުރެވޭ ގޮތުގައި މަޖިލިސް ގޮނޑި އެންމެ ފަސޭހައިން ކާމިޔާބުކުރެވޭނީ ސަރުކާރު ކޯލިޝަންގެ ޓިކެޓުގައި ކަަމަށް ވުމުން އިދިކޮޅު ޕާޓީތަކުގެ މީހުން ވެސް އަވަސް އަވަހަށް ޕީއެންސީއަށް ގެންދަނީ ސޮއި ކުރަމުންނެވެ. ޕާޓީގެ އެތެރޭގެ އިންތިޚާބުތަކުގައި ވާދަކުރެވޭނީ ޕާޓީގައި ވަކި މުއްދަތެއް ވެފައިވާ މީހުންނަށް ކަމަށް ވަކާލާތުކުރިޔަސް ރިޔާސީ ޓިކެޓް ކަނޑައެޅުމުގެ އިންތިޚާބުގައި ވެސް އެކަން އެގޮތަށް ތަންފީޒުކުރެވިފައި ނުވާކަން ހަމަ އެންމެންނަށް ވެސް އެނގޭތީ، އެފުރުޞަތު އެންމެންނަށް ވެސް އޮންނަން ޖެހޭނެކަމަށް ޤަބޫލުކުރާ ބަޔަކު ވެސް އުޅެއެވެ.
ޕީއެންސީގެ ރިޔާސީ ޕްރައިމަރީގައި ޑރ. މުޢިއްޒު ވާދަކުރައްވާފައި ވަނީ ވެސް ޕާޓީއަށް ސޮއި ކުރެއްވިތާ 24 ގަޑީ އިރުވެސް ނުވަނީހެވެ. އެހެންކަމުން އެ ބަހުސް އަކީ މިހާރު ކުރެވޭނެ ބަހުސެއް ނޫންކަމަށް ޤަބޫލުކުރާ މީހުން ވެސް ގިނައެވެ.
