އެމްޑީޕީގައި ޑިމޮކްރެޓިކް އުޞޫލުތައް ނެތްކަމަށް ތުހުމަތުކޮށް އެޕާޓީން ވަކިވުމަށް ފަހު ޑިމޮކްރެސީ ދަސްކޮށްދޭން އުފެއްދި ސިޔާސީ ޕާޓީއެއް ކަމުގައިވާ ދަ ޑިމޮކްރެޓްސް އުފެއްދުމަށް އެންމެ ބޮޑަށް މަސައްކަތްކުރި މުހިންމު ފަރާތްތަކެއް އެޕާޓީ ދޫކޮށްލުމަށް ނިންމާ އެކަން އިޢުލާން ކޮށްފިއެވެ.
ޑިމޮކްރެޓްސް ވުޖޫދުވުމަށް ފަހު އެންމެ ފުރަތަމަ ބޭއްވި އެތެރޭގެ އިންތިޚާބުގެ ނަތީޖާ ވެސް އޮޅުވާލާފައި ވާކަމަށް ގިނަ ބަޔަކު ތުހުމަތު ކުރެއެވެ. އަދި އެކަމުގެ ހިތްހަމަ ނުޖެހުންތަކުގައި މަރިޔަމް ރީހާން ނާޒިމް އާއި އަނޫޝާ ފަދަ ޑިމޮކްރެޓްސްގެ އެންމެ ބޮޑެތި ސޯބުތައް ވަނީ ޕާޓީ ދޫކޮށްލާފައެވެ.
ޑިމޮކްރެޓްސްގެ ރައީސްކަމަށް ވާދަކުރެއްވި ޙުސަން އަމްރު ވެސް ވަނީ އިންތިޚާބުގެ އިދާރީ ކަންކަމާ މެދު ހިތްހަމަ ނުޖެހޭކަމަށް ވިދާޅުވެފައެވެ. އެހެން ނަމަވެސް މަސްލަޙަތައްޓަކައި އިތުރަށް މައްސަލަ ޖައްސަން ބޭނުން ނުވާކަމަށާއި، އެެދެނީ ޕާޓީއަށް އިތުރު ކުރިއެރުންތައް ކަމަށް އަމްރު ވަނީ ވިދާޅުވެފައެވެ.
ދަ ޑިމޮކްރެޓްސްގެ ފުރަތަމަ ރައީސްކަމަށް އިންތިޚާބުވެފައި ވަނީ އަލްޢުސްތާޛް ޙަސަން ލަތީފްއެވެ. އަދި ނައިބު ރައީސްކަމަށް އިންތިޚާބުވެފައި ވަނީ އާޝިޔަތު އަލައިކާ އަދްނާންއެވެ.
