ޕީއެންސީގެ ފަރާތުން މަޖިލިސް އިންތިޚާބުގައި ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީއަށް ކުރިމަތި ލުމުމުގެ ސުންގަޑި މިއަދަށް ހަމަވާއިރު، ވޭތުވެދިޔަ ދެ ދުވަސް ތެރޭގައި އެކަމަށް އެދި ފޯމް ހުށަހެޅުމަށް ފަހު، އަބްދުލް ރަހީމް އާއި އެކު ޕޮޓޯ ނެގުމަށް މީހުން ޕާޓީ އޮފީހުގައި ކިއޫ ހަދަން ޖެހިއްޖެއެވެ.

ޕީއެންސީގެ މަޖިލިސް ޕްރައިމަރީގެ ވޯޓުލުން އޮންނާނީ 23 ޑިސެމްބަރު 2023 ގައި ކަމަށް އެ ޕާޓީން ކޮށްފައިވާ އިޢުލާންގައި ވެއެވެ. އެހެންކަމުން ޕްރައިމަރީ ކާމިޔާބުކުރުމަށް ވޯޓް އިތުރުކުރުމަށްޓަކައި އިތުރު ފަރާތްތައް ޕާޓީއަށް ވެއްދުމާއި، ކެމްޕެއިން ޙަރަކާތްތައް ވަނީ ފެށިފައެވެ. އެގޮތުން ވާދަކުރައްވާ ފަރާތްތަކުގެ އާއިލާ އާއި ގާތްތިމާގެ މީހުންނާ ރަޙްމަތްރިން ދަނީ ޕާޓީއަށް ސޮއި ކުރަމުންނެވެ.

ޕީއެންސީގެ މަޖިލިސް ޕްރައިމަރީގައި އޮތް އެންމެ ބޮޑަށް ބަހުސް ކުރެވޭކަމަކީ ޕާޓީއަށް އެންމެ ބޮޑަށް ޚިދުމަތް ކޮށްފައި ވަނީ ކާކުތޯކަމާ މެދުގައެވެ. ބައެއް މީހުން ބުނާގޮތުގައި އަލަށް ޕާޓީއަށް ވަންނަ ފަރާތްތަކަށް މަޖިލިސް ޕްރައިމަރީގައި ވާދަކުރެވިގެން ނުވާނެކަމަށެވެ. އެހެނީ އެތައް ޤުރުބާނީތަކެއް ޕާޓީގެ ޙައްޤުގައި ވެފައި ތިބި މީހުންނަށް އެފުރުޞަތު ގެއްލިދާނެކަމަށެވެ.

މަޖިލިސް ޕްރައިމަރީގައި ވާދަކުރަން ހުށަހަޅާ ފަރާތްތަކުގެ ކެންޑިޑެސީ ބަލައިގަތުމުގެ ޢުޞޫލުތައް ވަނީ ހަރުކަށި ކޮށްފައެވެ. އެގޮތުން ޕާޓީގެ ލީޑަރޝިޕަށް ފެނިއްޖެ ނަމަ ކެންޑިޑެސީ ބާޠިލްކުރެވޭ ގޮތަށް ޤަވައިދު ވަނީ އިޞްލާޙްކޮށްފައެވެ. އެހެންކަމުން ފޯމް ހުށަހެޅުމަށް ފަހު، އެޕްލިކޭޝަންއަށް ވާނެގޮތެއްގެ އިންތިޒާރުގައި އެތައް ބަޔަކު އެބަ ތިއްބެވެ.