ރައީސް ޑރ. މުޢިއްޒު ވެގެންދާނީ މިހާތަކަށް ރާއްޖޭގެ ވެރިކަމަށް ވަޑައިގެންނެވި ބޭފުޅުންގެ ތެރެއިން މަޖިލިސްގެ އެންމެ ކުޑަ ނިސްބަތެއްގެ ސަޕޯޓް ލިބިވަޑައިގެން ސަރުކާރެއް އެކުލަވާލެއްވި ރައީސްކަމުގައެވެ. ސިޔާސީ މަސްރަޙް ދިރާސާކުރައްވާ ބައެއް ތަޖުރިބާކާރުން ވެސް ރައީސް މުޢިއްޒުގެ ސަރުކާރެއް ދެމެހެއްޓެވިދާނެ ކަމާއި މެދު ސުވާލު އުފައްދަވާފައި ވެއެެވެ.
އިދިކޮޅު އެމްޑީޕީއަށް މަޖިލިސްގައި އޮތް ސުޕަރ މެޖޯރިޓީގެ ބޭނުންކުރަނީ ސަރުކާރަށް ދަތިވާނެހާ ގޮތެއް ބަލައިގެންނެވެ. އެންމެ ކުޑަމިނުން ޑރ. މުޢިއްޒު އެކުލަވާލެއްވި ވަޒީރުންގެ މަޖިލިސް އަށް މަޖިލިހުގެ ތަޅުމުން ރުހުން އަދިވެސް ދީފައި ނުވެއެވެ. އަދި ރައީސް މުޢިއްޒުގެ ވަޢުދުތައް ފުއްދެވުމަށް ބަޖެޓްގައި ހިމަނުއްވާފައިވާ މަޝްރޫޢުތައް ވަނީ ބަޖެޓުން އުނިކުރައްވާފައެވެ. މީގެ އިތުރުން ދަޢުލަތުގެ އިސްވެރިންގެ މުސާރަތައް ޤައުމުގެ އިޤްތިޞާދީ އަދި މާލީ ޙާލަތަށް ބެލުމެއް ނެތި، ވަނީ ބޮޑު ކުރައްވާފައެވެ. އޭގެ ތެރޭގައި މަޖިލިސް މެންބަރުންގެ މުސާރަ ވެސް ހިމެނެއެވެ. އަދި މީގެ އިތުރުން ދަޢުލަތަށް ޢާމްދަނީ ލިބޭ ބައެއް ކަންކަމަށް ބަދަލު ގެނެސްފައި ވެސް ވެއެވެ. މިއީ ސަރުކާރު ޒިންމާދާރުކުރުންތޯއެވެ؟ ނޫނީ ދިވެހި ދަޢުލަތާއި ސަރުކާރު ހިންގެވުމަށް ޖެއްސުންކުރުންތޯއެވެ؟ މިއީ ސަރުކާރަށް ތާޢީދުކުރައްވާ ފަރާތްތަކުން ކުރައްވާ ތުހުމަތު ތަކެކެވެ. އަދި އެންމެ ފާހަގަކުރެވޭ ކަމަކީ މިހުރިހާ ކަމެއް ހިނގަމުން ދާއިރުވެސް ރައީސް މުޢިއްޒު ބަހެއް ވިދާޅު ނުވާކަމެވެ. ބަހެއް ވިދާޅުވިޔަސް ވިދާޅުވެފައި ވަނީ މަދު ފަހަރެއްގައެވެ. އަދި އެއްވެސް ކަމަކަށް ފަސްޖެހުމެއް ނެތި، ފަސްއެނބުރި ބެލުމެއް ވެސް ނެތި، ސަރުކާރު ހިންގެވުމަށް ދަތިކަމެއް ނާންނާނެ މަގުތަކާއި ގޮތްތައް ހޯއްދަވައި، ތަރައްޤީގެ މަޝްރޫޢުތަކާއި، އިދާރީ ހިންގުން ވެސް ވަނީ ހަމަ މަގަށް އަޅުވާފައެވެ.
ބަޖެޓުން އުނިކުރި ގިރާވަރުފަޅު މަޝްރޫޢު ވެސް ބާރަށް ކުރިއަށް ގެންދަނީއެވެ. ހުރުން ދޭތޯ ނުދޭތޯ ބެލުމެއް ނެތި ވަޒީރުންގެ މަޖިލިސްގެ މެންބަރުން ވެސް ވުޒާރާތައް ފަތުއަޑު ކިޔާފައި ހިންގާލަނީއެވެ. އިދިކޮޅު އެމްޑީޕީއަށް ވާނުވާ ވެސް އަންގައިނުލައެވެ. ނުވިތާކަށް އެމްޑީޕީގެ މަޖިލިސް މެންބަރުންކޮޅު ވެސް ދަމައިގަނެ މުޅިން ސައިޒްކޮށްލައިފިއެވެ.
