ސްޕަރ ސްޓަރ ގޯލްކީޕަރުކަމުގައިވާ ޒުވާން ހޭންޑްބޯޅަ ކުޅުންތެރިޔާ ނައިނާ އަށް މުބާރާތުގެ އެންމެ މޮޅު ގޯލްކީޕަރުކަމުގެ މަޤާމު ނުލިބުނަސް ދެރަނުވާކަމަށާއި، ރީތި މޮޅު ކުޅުމެއް ކުޅެ މުބާރާތުގެ ޗެމްޕިއަންކަން ލިބުމުން ހިތްހަމަޖެހޭ ކަމަށް އޭނާ ބުނެފިއެވެ.

ފޯކައިދޫ ކައުންސިލް ސްޕޯޓްސް ފިއެސްޓާ ދެވަނަ ހޭންޑްބޯޅަ މުބާރާތުގެ ފައިނަލް މެޗްގައި ސްޕާރ ސްޓަރ އާއި ސަންހާއީ ބައްދަލުކުރި މެޗް ވަރަށް ވާދަވެރި ކުޅުމަކަށް ފަހު ކާމިޔާބުކުރީ ސްޕަރ ސްޓަރ އެވެ. ފައިނަލް މެޗަށް ފަހު ފޯކައިދޫގައި ވިދަމުން އަންނަ ތަރިއެއް ކަމަށްވާ ނައިނާ ފޭސްބުކްގައި ބުނެފައި ވަނީ މުބާރާތުގެ އެންމެ މޮޅު ގޯލްކީޕަރުކަމުގެ މަޤާމު އޭނާއަށް ނުލިބުނަސް ރީތި ކުޅުމެއް ދައްކައިދީފައި ވާނެކަމަށާއި، މުބާރާތުގެ ހުރިހާ މެޗެއްގައި ވެސް ޕާފޯމްކުރެވުނު ގޮތާ މެދު ހިތްހަމަޖެހޭ ކަމަށެވެ.

ނައިނާ ދެކޭގޮތުގައި އޭނާއަށް މުހިންމީ އޭނާއަށް މަޤާމެއް ލިބުން ނޫންކަމަށާއި، ޓީމަށް ކާމިޔާބު ލިބުންކަމަށެވެ. ކްލަބް ސްޕަރ ސްޓަރ ގައި މިވަގުތު ހުރި އެންމެ އަގު ބޮޑު އެއް ކުޅުންތެރިއަކީ ޓީމްގެ ގޯލް ބަލަހައްޓަމުން އަންނަ ޒުވާން ހޭންޑްބޯޅަ ތަރި ނައިނާއެވެ. ކޮންމެ އަހަރަކު ވެސް ޓަރާންސްފަރ މާކެޓް ހުޅުވުމާ އެކު ޓީމްތަކުން ނައިނާ ހޯދުމަށް މަސައްކަތްކުރާ ކަމަށް މަޢުލޫމާތު ލިބިފައި ވެއެވެ.

ސްޕަރ ސްޓަރ ގައި ނައިނާގެ އިތުރުން ވެސް ވަރަށް މޮޅެތި ކުޅުންތެރިން ހިމެނެއެވެ. އަދި މިއަހަރުގެ މުބާރާތުގައި ޓީމެއްގެ ގޮތުގައި އެންމެ ވަރުގަދަކަމަށް ފާހަގަކުރެވުނީ ވެސް ކްލަބް ސްޕަރ ސްޓަރ އެވެ. އަދި ހަމަ އެހެންމެ ސްޕަރ ސްޓަރ އަށް ޗެމްޕިއަންކަން ހޯދުމުގެ އެންމެ ބޮޑު އެއް ހިއްސާދާރަކީ ޒުވާން ނައިނާއެވެ. މުބާރާތުގައި ފަނޑިޔާރުންގެ ބައެއް ނިންމުންތަކާ މެދު ކޮންމެވެސް ވަރެއްގެ ހިތްހަމަ ނުޖެހުމެއް ހުރި ނަމަވެސް ފައިނަލް މެޗުގެ ނަތީޖާއަށް ފަހު ނައިނާ ހުރީ ލިބުނު ބޮޑު ކާމިޔާބީ އަށްޓަކައި ވަރަށް އުފަލުންނެވެ.