ކޮމަންޑޫ ދާއިރާގެ ޕީޕީއެމް/ޕީއެންސީ ޕްރައިމަރީގައި ވާދަކުރައްވާނެކަން އިޢުލާންކޮށްފައިވާ އެއް ކެންޑިޑޭޓް ކަމަށްވާ މުޙައްމަދު އިބްރާހީމްގެ ދެއަނބިން ވެސް ތިބީ ކުރީގެ ނައިބު ރައީސް އަޙްމަދު އަދީބު އިސްވެ އުފައްދަވާފައިވާ މޯލްޑިވްސް ތާޑްވޭ ޕާޓީގައިކަން ހާމަވެއްޖެއެވެ.

ޕީޕީއެމް ކޮމަންޑޫ ދާއިރާގެ މަޖިލިސް ޕްރައިމަރީގައި ވާދަކުރައްވަނީ މުޙައްމަދު އިބްރާހީމްގެ އިތުރުން ކޮމަންޑޫގެ ޒުވާން ބޭފުޅެއްކަމަށްވާ އިބްރާހީމް ވަޙީދުއެވެ. ދެ ބޭފުޅުން ވެސް ކެމްޕެއިން ޙަރަކާތްތައް ވަރުގަދަކޮށް ގެންދަވަނީ ދާއިރާގެ ރަށްތަކަށް ތާޢީދު ހޯދުމުގެ ދަތުރުތައް ކުރައްވަމުންނެވެ.

މުޙައްމަދު އިބްރާހީމްގެ ކެމްޕެއިންގައި ހަގު އަނބިކަނބަލުން މަރިޔަމް ނަސީމާ ގެންދަވަނީ ޢަމަލީގޮތުން ބައިވެރިވަމުންނެވެ. އެހެން ނަމަވެސް ދެއަނބިން ކުރެން އެއްވެސް އައިންބަކު މިހާތަނަށް ޕީޕީއެމް އަށް ވެސް އަދި ޕީއެންސީ އަށް ވެސް ސޮއިކުރައްވާފައެއް ނުވެއެވެ. އަދި ދެ އަނބިކަނބަލުން ވެސް ތިއްބެވީ އެމްޓީޑީގައެވެ.

މުޙައްމަދު އިބްރާހީމްގެ ހަގު އަނބި މަރިޔަމް ނަސީމާ އެމްޓީޑީގަައި ރަޖިސްޓަރީ ވެފައި ވަނީ 10 ޑިސެމްބަރ 2018 ގައެވެ. އަދި ދޮށީ އަނބި ފާތިމަތު އަޙްމަދު ރަޖިސްޓަރީ ވެފައި ވަނީ 12 ޑިސެމްބަރ 2018 ގައެވެ. ޕީއެންސީގެ ބައެއް ޢާންމު މެންބަރުން ތުހުމަތުކުރާ ގޮތުގައި ޚުދު މުޙައްމަދު އިބްރާހީމް އަކީ ވެސް އެމްޓީޑީގެ މެންބަރެކެވެ.