އެމްޑީޕީ ކޮމަންޑޫ ދާއިރާގެ ޕްރައިމަރީގައި ވާދަކުރައްވާ ކެންޑިޑޭޓް ކޮމަންޑޫގެ މިހާރުގެ ރައީސް މުޙައްމަދު ސިނާނަށް ބޮޑު އަޣުލަބިއްޔަތެއް ފޯކައިދޫއިން ހޯދައިދޭނެކަމަށް ފޯކައިދޫ ކައުންސިލްގެ ރައީސް އަޙްމަދު އާސިފް ވިދާޅުވެއްޖެއެވެ.
އާސިފް އެފަދަ ޔަޤީންކަމެއް ދެއްވީ ކެމްޕެއިން ފެށުމުގެ ގޮތުން މިއަދު ފޯކައިދޫ ބަނދަރު ސަރަޙައްދުގައި ބޭއްވި ބައްދަލުވުމުގައި ވާހަކަދައްކަވަމުންނެވެ. އާސިފް ވިދާޅުވީ ފޯކައިދޫ ތަރައްޤީ ކުރެވޭނެ ކެންޑިޑޭޓަކީ ހަމަ އެކަނި ސިނާންކަމަށެވެ. ދެން ތިބި ކެންޑިޑޭޓުންނަކީ އެފަދަ ކަމަކަށް ޤާބިލް ބައެއް ނޫންކަމަށެވެ.
ފޯކައިދޫ އެމްޑީޕީގެ ގިނަ ބަޔަކު ބައިވެރިވި މި ބައްދަލުވުމުގައި އިދިކޮޅު ފަރާތްތަކަށް ރައްދުނުދިނުމަށާއި، ރީތި ކެމްޕެއިނެއް ކުރުމަށް އިލްތިމާސްކުރެއްވިއެވެ. ރައީސް އާސިފް އެ އިޝާރާތްކުރައްވާ އިދިކޮޅު ފަރާތްތަކަކީ ކޮބައިކަން ޔަޤީނެއް ނޫނެވެ. އެއީ ޕްރައިމަރީ އިންތިޚާބަކީ ޕާޓީގެ އެތެރޭގެ އިންތިޚާބަކަށް ވާތީއެވެ.
މަޢުލޫމާތު ލިބޭގޮތުގައި ސިނާން އަކީ ކޮމަންޑޫ މަހުޖަނު އަދި އެމްޑީޕީ ކޮމަންޑޫ ދާއިރާގެ ރައީސް މުޙައްމަދު ޖަލާލް އެންޑޯޒްކުރާ ކެންޑިޑޭޓެކެވެ. އެހެން ނަމަވެސް ލިވާރޕޫލްގެ މެޗެއް ބަލާލުމަށް އިނގިރޭސި ފިލާތުގައި ހުރީތީ މިބައްދަލުވުމުގައި އޭނާ އަށް ބައިވެރިވެވޭ ގޮތެއް ނުވިއެވެ.
