އަޟުޙާ ޢީދު ފާހަގަކުރުމުގެ ގޮތުން ބ. ކަމަދޫގައި ކުރިއަށް ގެންދާ ކުޅިވަރު ޙަރަކާތްތައް މުޅި ރާއްޖޭގެ ސަމާލުކަމަށް އައިސް ތަޢުރީފާ ޚުޝާމިދުކުރުން އިންތިހާއަށް އިތުރުވެފައި ވާތީ، އެކަމާ ވަރަށް ބޮޑަށް ހިތްހަމަޖެހިވަޑައިނުގެން ކުރީގެ ބަންޑާރަ ނައިބު އަލްއުސްތާޛާ އައިޝަތު އާޒިމާ ޝަކޫރު ވާކަފުޅު ދައްކަވައިފިއެވެ.
އާޒިމާ ވިދާޅުވެފައި ވަނީ “ކަމަދޫ ފަތްމިނި ކުދިން” ގެ ނަމުގައި ވަކި ކުދިންތަކެއް ހުނިޖަހާ ފާހަގަކޮށްގެން ޕޮޓޯ އާއި ވީޑިއޯތައް ސޯޝަލް މީޑިޔާގައި ފެތުރުމަކީ މޮށުންކަމަށާއި، އެކުދިން ވަކި ތަފާތުކަމެއް ނުކުރާ ކަމަށާއި، ރަށުގެ ކުދިބޮޑު އެންމެން އެކުގައި ޢީދު ލަވަތަކަށް ނެށީކަމަށެވެ.
އެކަމަނާގެ ރުޅިގަނޑު ފަޅައިގެން ގޮސް އިތުރަށް ވިދާޅުވެފައި ވަނީ “ރީތި ވީމާ ނޫނީ ނަށަން ނިކުތީމާ ފޮށެވެނީއޭ ބުނާށެވެ. އަދި ރޭޕްކުރަނީ ރޭގަނޑު ބޭރަށް ދާތީއޭ ވެސް ބުނަނީތާއެވެ.”
ދިވެހީންގެ އަތުގައި އޮންނަނީ އެންމެ ފަހުގެ އައިފޯނު ކަމަށާއި، ރާއްޖެ ތަރައްޤީކުރަންވީ ސިންގަޕޫރު އަދި ޖަޕާން ފެންވަރަށެވެ. އެކަމަކު ސިކުނޑީގައި ތަހުޒީބުކަމެއް، ވިސްނުމުގައި އަޚުލާޤެއް ނެތްކަމަށެވެ. އާޒިމާގެ ފޭސްބުކް ޕޯޓަށް ވަރަށް ގިނަ ކޮމެންޓް ކޮށްފައި ވާއިރު، ގިނަ ބަޔަކަށް އެކަމަނާގެ ވާހަކަތައް ކަމުދިޔައެވެ. އެހެން ނަމަވެސް ތަފާތު ޚިޔާލުތަކާއި، ނުރުހުމާއި، މަލާމާތް ވެސް ރައްދުވެފައި ވެއެވެ.
