ކިރި މަސްކޮޅަށް ފައިސާ ނުލިބިގެން އައްޑޫގައި މަސްވެރިން އިހުތިޖާޖު ކުރަމުންދާއިރު، މާލޭގައި ފެންނަ މަންޒަރަކީ ޕާކްކޮށްފައި ހުންނަ ވެހިކަލްތައް ޓޯކުރުމަށް ފުލުހުން އަވަދިނެތި އުޅޭ މަންޒަރެެވެ. މިކަމަކީ ގުޅުމެއް ހުރިކަމެއް ކަމުގައި ނުވި ނަމަވެސް އިދިކޮޅު ފަރާތްތަކުގެ ފާޑުކިޔުމާއި، އެއްގަމު އުޅަނދުފަހަރު ދުއްވާ ފަރާތްތަކުގެ ނުރުހުން ފުލުހުންނަށް ވަނީ އަމާޒުވެފައެވެ.
މާލޭގެ ބޮޑުތަކުރުފާނު މަގުގައި ޕާކްކޮށްފައި ހުރި ހުރިހާ ވެހިކަލްތަކެއް އެއްރޭ ދަންވަރުގެ ވަގުތެއްގައި ވަނީ ޓޯކޮށްލާފައެެވެ. ޓޯޔާޑުގައި ޖާގަ ނެތުމުގެ ސަބަބުން ޓޯކުރި ވެހިކަލްތައް ބަހައްޓާފައި ހުރީ ކުޅިވަރު އެކުވެނި ދަނޑުގައެވެ. އެތަން ވެސް މިހާރު ވަނީ ފުރެން ކައިރިވެފައެވެ.
ބޮޑުތަކުރުފާނު މަގު ހުސްކުރުމަށް ފަހު، މިހާރު ފަރީދީމަގުގައި ވަނީ ފުލުހުން ކޯންޖަހާފައެވެ. އެއީ ވެސް ވަރަށް ގިނަ ޢަދަދެއްގެ ވެހިކަލްތައް ޕާކްކޮށްފައިވާ މަގެކެވެ. ފަރީދީމަގުގައި ކޯންޖެހުމުގެ ސަބަބުން ބައެއް މީހުންގެ ވެހިކަލްތައް ވަނީ ނަގާފައެވެ. އެހެން ނަމަވެސް އަދިވެސް ގިނަ ޢަދަދެއްގެ ވެހިކަލްތައް ޕާކްކޮށްފައި އެބަހުުއްޓެވެ. ހަމަ ކޮންމެ ވަގުތެއްގައި ވެސް އެމަގުގައި ހުރި ވެހިކަލްތައް ފުލުހުން ޓޯކޮށްފާނެއެވެ.
މީހުން ތުހުމަތުކުރާ ގޮތުގައި ވެހިކަލްގައި އިސްޓިކާ ނުޖެހުމަކީ ރިޔާސީ ވަޢުދަކަށް ވާތީ އިސްޓިކާ ޖެހުމުގެ ބަދަލުގައި ޓޯކުރަނީ ކަމަށާއި، އެއީ ހަމަ އެކަނި ފައިސާ ހޯދުމުގެ މަޤުޞަދުގައި ކުރާކަމެއް ކަމަށެވެ.
