މިހާރު ރާއްޖޭގައި ފެންމަތިވެގެން މިއުޅޭ ސިހުރުގެ މައްސަލައަކީ ރައްޔިތުން ކަންބޮޑުވާންޖެހޭ ސީރިއަސް މައްސަލައެއް ކަމަށް ގިނަ ބަޔަކު ބުނަން ފަށައިފިއެވެ. އެއީ ދިވެހިރާއްޖޭގެ ރައީސުލްޖުމްހޫރިއްޔާއަށް ސިހުރު ހެދުމަކީ އާދައިގެ ކުޑަކަމެއް ނޫނެވެ. ރައީސުލްޖުމްހޫރިއްޔާގެ މަސްޢޫލިއްޔަތުތަކާއި ޒިންމާތައް އެއްވެސް ނުފޫޒެއް ނެތި އަދާކުރެވިދާނެކަމާ މެދު މީހުން ސުވާލު އުފައްދަން ފަށައިފިއެވެ.
ރައީސް ޑރ. މުޢިއްޒަށް ސިހުރު ހެދިކަމުގެ ތުހުމަތުގައި އެމަނިކުފާނުގެ ސްޓޭޓް މިނިސްޓަރެއް ކަމަށްވާ ޝަމްނާޒް ޢަލީ ސަލީމް ވަނީ ހައްޔަރު ކޮށްފައެވެ. އަދި އޭނާ ހައްޔަރުކުރުމުގެ ކުޑަ ވަގުތުކޮޅެއް ކުރިން އެކަމަނާގެ ފިރިކަލުން ވަނީ އެކަމަނާ ވަރިކުރައްވާފައެވެ. އަދި އެކަމަނާގެ ފިރިކަލުންނަކީ ރައީސުލްޖުމްހޫރިއްޔާގެ އޮފީހުގެ މިނިސްޓަރެއް ކަމަށްވާ އާދަމް ރަމީޒްއެވެ. އެހެންކަމުން ކަންހިނގާފައިވާ ގޮތަށް ބަލާއިރު، ރައްޔިތުން ކަންބޮޑުވާންޖެހޭ މައްސަލަތަކެއް އެބަހުއްޓެވެ. ރައީސް ޑރ. މުޢިއްޒަށް ހުރީ ހެދި ސިހުރު ޖެހިފައިތޯ ނޫންތޯއެވެ. އަދި ޖެހިފައި ވާނަމަ ރައީސުލްޖުމްހޫރިއްޔާގެ މަސްޢޫލިއްޔަތުތަކާއި ޒިންމާތައް، ނުފޫޒެއް ނެތި އަދާކުރެއްވުމަށް އެމަނިކުފާނު މިހާރު ފިޓްތޯ ނޫންތޯއެވެ.
މިއަދު ސޯޝަލް މީޑިޔާގައި ފެތުރޭ ޚަބަރުތައް ބުނާގޮތުގައި ރައީސުލްޖުމްހޫރިއްޔާގެ އޮފީހުގެ މިނިސްޓަރު އާދަމް ރަމީޒް ވެސް ވަރަށް ކުއްލިގޮތަކަށް ރާއްޖެ ދޫކޮށް ވަނީ ފިއްލަވާފައެވެ. އަދި އެމަނިކުފާނު ފިއްލެވީ ރައީސުލްޖުމްހޫރިއްޔާއަށް ސިހުރު ހެދިކަމަށް ތުހުމަތު ކުރެވުމުން ކަމަށް ވެއެވެ. އަދި އިތުރަށް ފެތުރޭ މަޢުލޫމާތުތަކުގައި ބުނާގޮތުން ޝަމްނާޒް އާއި ރައީސް ޑރ. މުޢިއްޒު އާއި ދެމެދު އާދަޔާ ޚިލާފު ގުޅުންތަކެއް އެމަނިކުފާނުގެ މޭޔަރުކަމުގެ ދުވަސްވަރާއި ރިޔާސީ އިންތިޚާބުގެ ދުވަސްވަރުގައި ބޭއްވުމުގެ ސަބަބުން މިހާރު ވަނީ އިޝްޤީ ލޯތްބައް ބަދަލުވެފައި ކަމަށާއި، ރައީސަށް ހުރީ ވަރަށް ބޮޑަށް އިސްތިރިޖެހިފައި ކަމަށެވެ.
