ބަންދުގައި ހުއްޓާ މިއަދު ކުއްލި ގޮތަކަށް ނިޔާވި ށ. ފުނަދޫ ޒަމާނީވިލާ މުޙައްމަދު ޖަމީލް (45 އަހަރު) ގެ ހަށިގަނޑުގައި އަނިޔާތަކެއްގެ ނިޝާންތަކެއް ހުރިކަމަށް ނޫސްތަކުގައި ރިޕޯޓްކޮށްފިއެވެ.
އެގޮތުން މައްޔިތާގެ މޫނުމަތީގައި ވެސް އަނިޔާތަކެއް ލިބިފައި ހުރި ނިޝާންތަކެއް ހުރިކަން ވަނީ ފާހަގަކުރެވިފައެވެ. އެއީ ކިހިނެތް ލިބިފައި ހުރި ގެއްލުންތަކެއް ކަމެއް އަދި ޔަޤީނެއް ނުވެއެވެ. އޭނާގެ މައްޗަށް ކުރެވޭ ކަށުނަމާދު މިރޭ ފަތިސް ނަމާދަށް ފަހު ހުޅުމާލޭގައި ހުންނަ މަސްޖިދުލް ޒައިދު ބިން ޘާބިތުގައި ކުރުމަށް ވަނީ ތާވަލުކޮށްފައެވެ. އަދި ވަޅުލުމަށް ހަމަޖެހިފައި ވަނީ ހުޅުމާލޭ ސަހަރާގައެވެ.
ޖަމީލް އަކީ ނަފުސާނީ ބައްޔަކަށް ފަރުވާ ހޯދަމުންދާ މީހެއްކަމަށް ވެސް މަޢުލޫމާތު ލިބެއެވެ. އަދި އޭނާ ދަންނަ މީހެއްކަމަށްވާ ތާލިބު ފޭސްބުކްގައި ވަރަށް ތަފުޞީލުކޮށް ލިޔުއްވާފައި ވާގޮތުގައި އޭނާގެ ނަފުސާނީ ބައްޔަށް ބޭނުންވާ ބޭސްފަރުވާ ނުލިބޭތާ ވަރަށް ދުވަސް ވެއްޖެކަމަށާއި، އެހެން ހުއްޓާ ނިޔާވުމަކީ ވަރަށް ބޮޑު އިހުމާލެއްކަމަށެވެ.
މިކަމާ ގުޅޭގޮތުން ކަމާބެހޭ އެއްވެސް އިދާރާއަކުން މަޢުލޫމާތު ލިބޭގޮތް ވަނީ ނުވެފައެވެ.
