ޖަމީލްގެ މަރާ ގުޅިގެން މުޅި ރާއްޖޭގައި ކަންބޮޑުވުން ފާޅުކުރަމުން ގެންދާއިރު ވެސް ހިއުމަން ރައިޓްސް ކޮމިޝަނުން އެއްވެސް ތަޙްޤީޤެއް ނުކޮށް ބަހެއް ވެސް ނުކިޔާ ހަނު ތިބޭތީ މީހުން ފާޑިކިޔަން ފަށައިފިއެވެ. ޖަމީލްގެ ހަށިގަނޑުގައި އަނިޔާތަކެއްގެ ނިޝާންތައް ފެންނަން ހުރުމުން ވަރަށް ގިނަ ބަޔަކު ގެންދަނީ އެކަމުގެ ކަންބޮޑުުވުން ފާޅުކުރަމުންނެވެ.
ކުރީގެ ބަންޑާރަ ނައިބު އަލްއުސްތާޛާ އައިޝަތު އާޒިމާ ޝަކޫރު ވިދާޅުވައެފައި ވަނީ ދައުލަތުގެ ބެލެހެއްޓުމުގެ ދަށުގައި ހުރިމީހަކު، ޚާއްޞަގޮތެއްގައި ދައުލަތުގެ ބެލެހެއްޓުމުގެ ދަށުގައި ބަންދުގައި ހުއްޓާ އެއްވެސް މީހަކު މަރުވެއްޖެ ނަމަ، ބައިނަލްއަޤްވާމީ ބެސްޓް ޕްރެކްޓިސްއަކީ މިނިވަން ތަޙްޤީޤެއްކުރުން ކަމަށާއި، އެއީ އޭނާގެ މަރުހިއްޕަވާ ވަގުތު އެކަނިނޫން ކަމަށާއި، އޭނާ ބަންދުގައި ހުރިއިރުގެ ކަންކަން ބަލުމަށާއި އެމަރުގައި އެއްވެސް ގޯހެއްނެތްކަން މިނިވަންކަމާއެކު ޔަޤީންކުރުމަށްޓަކާ ކަމަށެވެ. އަދި ގޯހެއް އޮތްނަމަ ފިޔަވަޅުއެޅުމަށާއި، މަރުވިމީހާގެ ޢާއިލާގެ ހިތްހަމަޖެހުމަށްޓަކައި ކަމަށާއި، އޭނާ ބެލެހެއްޓި ދައުލަތުގެ މުއައްސަސާގެ މުއައްޒަފުންގެ ރައްކާތެރިކަމަށްޓަކައި ވެސް ކަމަށެވެ. ދިވެހިރާއްޖޭގައި އެކަންކުރަން ދުސްތޫރީ އަދި ޤާނޫނީ ޒިންމާއޮތީ ހިޔުމަންރައިޓްސް ކޮމިޝަނަށް ކަމަށާއި، އެހެނަސް މަރަށް 24 ގަޑިއިރު ވީއިރުވެސް އަދި ހިޔުމަން ރައިޓްސް ކޮމިޝަންގެ ބަހެއް ނީވޭކަމީ ދެރަވަރުކަމެއް ކަމަށެވެ.
މިހާތަނަށް ފުލުހުންނާއި ކަރެކްޝަންގެ ފަރާތުން ތަފާތު އެތައް ގޮތަކަށް ވާހަކަދައްކާފައި ވާތީ އެކަމުގައި ސުވާލުތަކެއް އުފެދޭކަމަށް ބުނެ އާންމުންގެ ފާޑުކިޔުންތައް ވަނީ އަމާޒުވެފައެވެ.
