ދިވެހިރާއްޖޭގައި ހިންގާ އޮންލައިން ނޫސްތަކުގެ ތެރެއިން ނޫހެއްކަމަށްވާ ދުވަސް ނޫހުގެ ސެކިއުރިޓީ ވަރުގަދަކޮށް ގިނަ ބަޔަކަށް ނުވަދެވޭ ގޮތަށް ބްލޮކް ކުރަމުންދާތީ ސޯޝަލް މީޑިޔާގައި އެކަމުގެ ޝަކުވާކުރާ ފަރާތްތައް ގިނަވެއްޖެއެވެ.

އެއްވެސް ސަބަބެއް ނެތި ނޫސް ވެބްސައިޓަށް ވަނުން މަނާކުރާކަމަށް ބައެއް މީހުން އެމީހުންގެ އަމިއްލަ ފޭސްބުކް އެކައުންޓްތަކުގައި ބުނެފައި ވެއެވެ. ބައެއް މީހުން ދެކޭގޮތުގައި އެކަން ދިމާވަނީ ނޫހުން ލިޔާ ބައެއް އާޓިކަލްތަކަށް ކޮމެންޓް ކުރަން ފެށުމުންނެވެ. އަދި ތަފާތު ޚިޔާލުތައް ފާޅުކުރުން ގިނަ ވެއްޖެ ނަމައެވެ. އެއީ ޙަޤީޤަތެއް ކަމުގައި ވާނަމަ ކިތަންމެހާ ވެސް ދެރައެވެ. އެހެނީ އެއީ ނޫސްވެރިކަމުގެ އެންމެ އަސާސީ އުޞޫލްތަކާ ވެސް ޚިލާފު ކަމެކެވެ.

މިކަމާ ގުޅޭގޮތުން ސޯޝަލް މީޑިޔާގައި ޝުޢޫރު ފާޅުކުރައްވާފައިވާ ބައެއް ފަރާތްތަކުން ބުނެފައި ވަނީ ދުވަސް ނޫހުގެ ވެބްސައިޓަށް ވަނުން މަނާކޮށް، ބްލޮކް ކޮށްފައި ވާތީ އެކަން ރަނގަޅު ކޮށްދެއްވުމަށް އެދި ސީދާ ވެރިންނަށް ވެސް ހުށަހަޅާފައި ވާނެކަމަށެވެ. ނަމަވެސް އެއްވެސް ޙައްލެއް އައިސްފައި ނުވާކަމަށާއި، ވީގޮތެއް ވެސް ނޭނގޭ ކަމަށެވެ.

އަނެއް ބަޔަކު ބުނެފައި ވަނީ ސެކިއުރިޓީ ސަބަބަކަށްޓަކައި ވެސް އެންމެ އެކްޓިވްކޮށް ކޮމެންޓްކުރާ މީހުން ހުނިޖަހާ ފާހަގަކޮށްގެން ބްލޮކް ކުރުމަކީ ކަންބޮޑުވާ ކަމެއް ކަމަށެވެ. އަދި އަނެއް ބަޔަކު ބުނެފައި ވަނީ އެގޮތަށް ބްލޮކް ކުރަމުންދާނަމަ ދުވަސް ނޫސް ބޮއިކޮޓްކުރަން ގޮވާލަން ޖެހިދާނެކަމަށެވެ.

ދުވަސް ނޫހަކީ 2014 ވަަނަ އަހަރުން ފެށިގެން ހިންގަމުން ގެންދާ ކާމިޔާބު އޮންލައިން ނޫހެކެވެ.