ކުރީގެ ޚާރިޖީ ވަޒީރުގެ އަނބިކަނބަލުން ޒިފްލީނާ ހުޅުމާލެ އިން އެފްޑަބްލިއު ރެސިޑެންސް އިން 1،200 އަކަފޫޓްގެ ފްލެޓެއް 3.5 މިލިއަން ރުފިޔާ އަށް ބައްލަވައިގަތީ ފޯއް ވިއްކައިގެން ހޯދި ތަނަވަސްކަމެއް ކަމުގައި ވަނީ ވިދާޅުވެފައެވެ.

ލުހުންގެ ތަރުޖަމާނު އޭސީޕީ އަޙްމަދު ޝިފާން އާއި ޙަވާލާދީ ރިޕޯޓްކޮށްފައި ވާގޮތުން ފްލެޓް ގަތް މުޢާމަލާތުގައި ކޮރަޕްޝަން ހިމެނޭ ކަަމަށް މީހަކު މައްސަލަ ހުށަހަޅާފައި ވާތީ، އެކަން އިތުރަށް ތަޙްޤީޤު ކުރުމަށް އޭސީސީއަށް ފޮނުވައިފި ކަމަށެވެ.

ޒިފްލީނާ އަގުބޮޑު ފްލެޓެއް ބައްލަވައިގަތުމުން ގިނަ ބައެއްގެ ސަމާލުކަން އައުމާއި، ސޯޝަލް މީޑިޔާގެ ފާޑުކިޔުންތައް އަމާޒުވުމުން އެކަމަނާ ވަނީ އެވާހަކަތަކަށް ރައްދު ދެއްވާފައެވެ. ފޭސްބުކްގައި ކުރެއްވި ޕޯސްޓެއްގައި ވިދާޅުވެފައި ވަނީ އެކަމަނާ އެޕާޓްމަންޓް ބައްލަވައިގަތީ ސްޓޭޓް މިނިސްޓަރުގެ މަޤާމް ލިބިވަޑައިގަތުމުގެ ކުރިން ކަމަށާއި، އެއީ ފޯއްވިއްކައިގެން ލިބުނު ފައިސާ ކަމަށާއި، އެސެޓް ޑިކްލަރޭޝަން ފޯމުގައި އެޕާޓްމަންޓާ ގުޅޭ ތަފުޞީލުތައް ހިމަނުއްވާފައި ވާނެކަމަށެވެ.