ދިވެހިރާއްޖޭގައި އިޤްތިޞާދީ ސިނާޢަތެއްގެ ގޮތުގައި ދަނޑުވެރިކަން ތަރައްޤީ ކުރުމުގެ މަޤުޞަދުގައި ސަރުކާރުން އުފެއްދެވި ކުންފުންޏެއް ކަމަށްވާ އެގްރޯ ނޭޝަނަލް ކޯޕަރޭޝަން އާއި ޒުވާން ދަނޑުވެރިޔާ ޢަބްދު ﷲ ރަމްޒީ އާއި އެކު ކިއުކަމްބާ ގަތުމުގެ އެއްބަސްވުމެއްގައި އިއްޔެ ސޮއި ކޮށްފިއެވެ.
މި އެއްބަސްވުމުގެ ދަށުން ޒުވާން ދަނޑުވެރިޔާގެ ގްރީންހައުސް ދަނޑުތަކުގައި އިންދާ ހައްދާ ކިއުކަމްބާގެ ބާވަތްތައް ވިއްކޭނީ ހަމަ އެކަނި އެގްރޯނެޓަށެވެ. އެގްރޯނެޓާއެކު އެއްބަސްވުމުގައި ސޮއި ކުރުމުން ރަމްޒީގެ ކިއުކަމްބާ މާކެޓްކުރާނީ އެގްރޯނެޓުންނެވެ. އެގްރޯނެޓުން ހޯލްސޭލް އުޞޫލުން އެތަކެތި ޑިސްޓްރިބިއުޓް ކުރާނީ އައްޑޫ ސިޓީގައި ހިމެނޭ ރަށް ރަށާއި، ފުވައްމުލައް ސިޓީ އަށެވެ. މަޢުލޫމާތު ލިބިފައިވާ ގޮތުގައި އެތަކެތި ހޯލްސޭލްކޮށް ވިއްކޭނެ އިންތިޒާމްތައް މިހާރު ވަނީ ހަމަޖައްސާފައެވެ.
އައްޑޫ މީދޫގައި ކޯލްޑް ސްޓޯރޭޖާއި ޑްރައި ސްޓޯރޭޖް ހިމެނޭ ޑިސްޓްރިބިއުޝަން ސެންޓަރެއް އެގްރޯނެޓުން ވަނީ ޤާއިމްކޮށްފައެވެ. އަދި އެތަނަށް ބޭނުންވާ އެހެނިހެން ވަޞީލަތްތަކާއި، މުވައްޒަފުން ވެސް ވަނީ ހަމަޖައްސާފައެވެ. އަދި މިއީ އައްޑޫގައި އެގްރޯނެޓުން ހިންގާ މިފަދަ ފުރަތަމަ މުޢާމަލާތްކަމަށް ވާތީ، ވީހާވެސް ފުރިހަމަކޮށް، ވިޔަފާރިވެރިންނަށް ލުއިފަސޭހަ ވާނެ ގޮތްތައް ވަނީ އިންތިޒާމްކޮށްފައެވެ.
ޒުވާން ދަނޑުވެރިޔާގެ ދަނޑުތަކުގައި އުފައްދަނީ އާދައިގެ ކިއުކަމްބާއެއް ނޫން ކަމަށާއި، އެއީ މޮޅު ކިއުކަމްބާ (ލެބަނީޒް ކިއުކަމްބާ) ކަމަށް ވެއެވެ.
