ދިވެހި ރައްޔިތުންގެ ބޭންކް ކަމަށްވާ ބޭންކް އޮފް މޯލްޑިވްސްގެ މުވައްޒަފުންގެ މިސްޓޭކުން ނުބައި އެކައުންޓަކަށް ފައިސާ ފޮނުވިއްޖެ ނަމަ ހަމަ ވަގުތުން އެކަން ރަނގަޅު ކޮށް ފައިސާ އަނބުރާ ހޯދެއެވެ. އެހެން ނަމަވެސް ކަސްޓަމަރުންނަށް އެއީ އޮތްގޮތެއް ނޫންކަން އިއްޔެގައި ހާމަކޮށްދީފިއެވެ.
ބޭންކްގެ ހިއުމަން މިސްޓޭކަކުން އަމިއްލަ ފަރުދެއްގެ އެކައުންޓަށް އިއްޔެގައި 77 ބިލިޔަން ޔޫއެސް ޑޮލަރު ވަނީ މުސާރައިގެ ގޮތުގައި ފޮނުވިފައެވެ. އަދި ހަމަ ވަގުތުން އޮންލައިން ބޭންކިންގ އާއި މޮބައިލް ބޭންކިންގ އާއި އޭޓީއެމްތަކުގެ ޚުދުމަތް ވަނީ ޑައުންކޮށްލާފައެވެ. އެއީ އެފައިސާއިން ބައެއް ވިޔަސް އެހެން އެކައުންޓަކަށް ފޮނުވުމުގެ ފުރުޞަތު ނުދިނުމަށެވެ. އަދި އެއްވެސް މިންވަރެއް އޭޓީއެމް މެދުވެރިކޮށް ނެގުމާއި ފޮނުވުން ވެސް ހުއްޓުވާލުމަށެވެ.
ބައެއް މީހުން ކަންބޮޑުވުން ފާޅުކޮށް ސޯޝަލް މީޑިޔާގައި ކޮށްފައި ހުރި ފޯސްޓްތަކުގައި ވަރަށް ބޮޑަށް ނުރުހުން ފާޅުކޮށް، ބޭންކަށް އިތުބާރު ނުކުރެވޭ ކަމަށް ބުނެ އެތައް ބައެއްގެ ކަންބޮޑުވުންތައް ބަންޑުން ކޮށްލާފައި ވެއެވެ. ބައެއް މީހުން ސުވާލު އުފައްދާފައި ވަނީ އެމީހުން ގާތު ގޮތްނޭނގޭ ލިންކުތަކަށް ނުފިއްތަން ބުނެފައި ބެންކުން އެހާ ބޮޑު އެއްޗަކަށް ފިތާލީ ކީއްވެތޯއެވެ.
އަދި ހަމަ އިއްޔެގައި މީހަކު ޕޯސްޓް ކޮށްފައި ވާގޮތުގައި އޭނާ ނުވެސް ދެނަހުރި އޮންލައިން މުޢާމަލާތަކަށް 16 ފަހަރު ފައިސާ ކަނޑާލާފައި ވާކަމަށެވެ. އެހެން ނަމަވެސް އެކަމުގެ ޒިންމާ ނަގަންޖެހެނީ ކަސްޓަމަރުންނަށެވެ. އެއީ ބެންކަށް އެއްވެސް ކަމެއް ކޮށްދެވޭނެ ކަމަކަށް ނުވެއެވެ. އަދި ރީފަންޑް ފޯމެއް ލިޔަސް ދުވަހަކު ފައިސާއެއް ލިބޭކަމަކަށް ނުވެއެވެ. ކޮންމެ ގޮތެއްގައި ވެސް ބެންކަށް ރައްޔިތުންގެ އިތުބާރު ގެއްލުމަކީ ވަރަށް ބޮޑު ޤައުމީ އަދި އިޤްތިޞާދީ މައްސަލައެކެވެ.
