ހަމާސްގެ ޕޮލިކަލް ބިއުރޯގެ އެންމެ އިސް ލީޑާރ ޝަހީދު އިސްމާޢީލް ހަނިއްޔާ އީރާންގައި ހުންނެވި ލޮކޭޝަން ދެނެގަނެވިފައި ވަނީ އޭނާގެ އަތުގައި އޮތް ފޯނަށް ވަޓްސްްއެޕް އަޅާފައި އޮތުމުންނާއި، ޖާސޫސްކުރެއްވުމަށް ގެންގުޅުއްވި އެހެން އެޕްލިކޭޝަނެއްގެ ސަބަބުން ކަމަށް އެނަލިސްޓުން ރިޕޯޓްކޮށްފިއެވެ.
އިސްމާޢީލް ހަނިއްޔާ ޝަހީދު ކޮށްލާފައި ވަނީ އީރާންގެ ރައީސް ހުވާ ކުރެއްވުމުގެ ރަސްމިއްޔާތުގެ ދަޢުވަތަކަށް އެޤައުމަށް ވަޑައިގެން ހުންނަވަނިކޮށް އިޒްރޭލް ސިފައިންގެ ޑްރޯން ޙަމަލާއެއް ދީގެންނެވެ. ރިޕޯޓްތައް ބުނާގޮތުން ހަނިއްޔާ ހުންނެވި ގޭގެތެރެއަށް ޑްރޯން ވަދެފައި ވެއެވެ.
އެވަގުތު އެގޭތެރޭގައި ތިބި އޭނާގެ ބޮޑީގާޑުންގެ އިތުރުން ޙިޒްބު ﷲ ގެ އިސް ކޮމާންޑަރެއް ވެސް ޝަހީދުވެފައި ވާކަމަށް މަޢުލޫމާތު ލިބެއެވެ. އެ ޙަމަލާއަށް މަދަދުވެރި ވެފައި ވަނީ އެމެރިކާގެ ސްޕެޝަލް ފޯރސެސްގެ ސިފައިން ކަމަށް ވެސް ރިޕޯޓްތައް ބުނެއެވެ.
އިސްމާޢީލް ހަނިއްޔާ އަކީ ފަލަސްޠީންގެ މިނިވަންކަމަށް އަގު ނުކުރެވޭހާ ގިނަ ގުނަ ޚިދުމަތްތަކެއް ކޮށްދެއްވާފައިވާ ހިތްވަރު ގަދަ މުޖާހިދެކެވެ. އެހެންކަމުން ހަނިއްޔާއަށް އޮތް ލޯތްބާއި އިޙްތިރާމް ބަންޑުން ވެގެންދިޔަ މަންޒަރު އޭނާގެ ޖަނާޒާގައި ފެނިގެންދިޔައެވެ. އިސްމާޢީލް ހަނިއްޔާގެ ހަށިކޮޅު ފަސްދާނުލެއްވީ ޢަަތަރުގައެވެ.
އިސްލާމީ ޤައުމުތަކުގެ އެންެމެ އިސްވެރިންނާއި، ޑިޕްލޮމެޓުންނާއި، މަޖިލިސް މެންބަރުންނާއި، މިނިސްޓަރުންގެ އިތުރުން އިންސާނިއްޔަތަށް ޚިދުމަތްކުރާ ޖަމިއްޔާ ޖަމާޢަތްތަކުން އިސްމާޢީލް ހަނިއްޔާގެ ޖަނާޒާގައި ބައިވެރިވެފައި ވެއެވެ. މަޝްރަޙް ދިރާސާކުރާ ފަރާތްތަކުން ބުނާގޮތުގައި ހަނިއްޔާ ޝަހީދުކޮށްލުމަކީ ހަމާސް އިތުރަށް ވަރުގަދަވާނެ ކަމެކެވެ. ޝަހީދު އިސްމާޢީލް ހަނިއްޔާގެ ލޭގެ ބަދަލު ހިފަން އެމީހުން ކުރާން ޖެހުނު ކޮންމެ ކަމެއް ކުރާނެއެވެ.
