މާފުށީ ސްކޫލްގައި މިއަދު ބޭއްވި ރަސްމިއްޔާތުގައި މި މަޝްރޫޢު އިފްތިތާޙުކޮށްދެއްވީ ތަޢުލީމާ ބެހޭ ވަޒީރު ޑރ. އިސްމާޢިލް ޝަފީޢު އެވެ.
ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ ހުރިހާ ސްކޫލެއް އޭސީ ކުރަން މި ފަށާ މަޝްރޫޢަކީ ފިނިކުރުމަކުން ނިންމާލާ ކަމެއް ނޫން ކަމަށާއި، ކޫލް ސްކޫލެއްގައި ހިތަށް ވެސް ފިނިކަން ލިބޭނެކަމަށާއި، އުފާވެރިކަން އުތުރި އަރާނެކަމަށާއި، ފިނިކަމާ އެކު ދަރިވަރުންގެ ސްލޫކާއި އުޅުމަށް ހެޔޮ ބަދަލުތަކެއް އަންނާނެ ކަމަށާއި، ވިޔާނުދާ ކަންތައްތަކުން ދަރިވަރުން ދުރުހެލިވާނެ ކަމަށާއި، ހިތްތައް އުފަލުން ފޮޅިގެންދާނެ ކަމަށެވެ.
ވަޒީރު ވިދާޅުވެފައި ވަނީ…..
“ބުލީއެއް ނުކުރާނެ. ރުޅިވެރިކަމެއް މިފަދަ މާހައުލެއްގައި ނޯންނާނެ. ޓީޗަރުންނާއި ސްކޫލު މެނޭޖްމެންޓާއި ބެލެނިވެރިން އެންމެން ގުޅިގެން ކުރާ މަސައްކަތުގެ ނަތީޖާއަކަށް ވާން ވާނީ ރަށަށް، ގައުމަށް އަދި އެ ކުދިންގެ މުޅި ދިރިއުޅުމަށް އުޖާލާކުރުވަނިވި ފިލާވަޅުތަކެއް، ތަރުބިއްޔަތު ތަކެއް އަދި ކާމިޔާބު ކާމިޔާބު އިންސާނުން އުފެއްދުމަށް ލިބެން ޖެހޭ ހުރިހާ ތައުލީމަކާއި ތަރުބަވީ ކަންތައްތަކެއް ފުރިހަމަވެފައިވާ ވެއްޓަކަށް ސްކޫލް ވެށި ވެގެން ދިއުން.” މިހެންނެވެ.
އެހެން ނަމަވެސް އޭސީތަކަށް ވާ ފައިސާ ބެލެނިވެރިންގެ އަތުން ނެގުމަށް ސްކޫލްތަކަށް އަންގައިފި ކަމަށް މަޢުލޫމާތު ލިބެއެވެ. އެހެންކަމުން ބެލެވެރިންގެ ހައްޓަކަށް، ކައްޓަކަށް ހިތަކަށް ލިބޭނެ އެއްވެސް ފިނިކަމެއް ނެތެވެ.
