ދަނޑުވެރިންގެ ދުވަހާއި ދުނިޔޭގެ ކާބޯތަކެތީގެ ދުވަސް އެކުގައި ގުޅިގެން ކުރިއަށް ގެންދިއުމާއި ގުޅޭ ގޮތުން އެގްރޯނެޓްގެ އިސް ބޭފުޅުންނާއި މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑރ. އައިޝަތު ރަމީލާ މިއަދު ބައްދަލުކުރައްވައިފިއެވެ.
އެގްރިކަލްޗަރ އެންޑް އެނިމަލް ވެލްފެއަރ މިނިސްޓްރީގައި ކުރިއަށް ދިޔަ މި ބައްދަލުކުރެއްވުމުގައި ދެ ފަރާތް ގުޅިގެން ދަނޑުވެރިންގެ ދުވަހާ ދުނިޔޭގެ ކާބޯތަކެތީގެ ދުވަސް ފާހަގަކުރުމަށް ކުރެވިދާނެ ކަންކަމާ ގުޅޭ ގޮތުން މަޝްވަރާކުރެވިފައި ވާކަމަަށް އެމިނިސްޓްރީން މަޢުލޫމާތު ދެެއްވައެވެ.
ޚަރަދުކުޑަކުރުމަށް ބޮޑެތި ހަފްލާތައް މި ދުވަސްވަރު ނުބޭއްވުމަށް ސަރުކާރުން ނިންމަވާފައިވާތީވެ، ވީހާވެސް ޚަރަދުކުޑަ ގޮތަކަށް މި ދެ ދުވަސް ވެސް ފާހަގަކުރެވިދާނެ ގޮތްތަކާއި ގުޅޭ ގޮތުން ވެސް މަޝްވަރާކުރައްވާފައި ވެއެވެ.
މި ބައްދަލުކުރެއްވުމުގައި ދަނޑުވެރިކަން ކުރުމަށް ބޮޑެތި އިންވެސްޓްމަންޓްތައް ކޮށްފައި ހުރި ބިންތަކާ ދަނޑުވެރިކަން ކުރުމަށް ދިގުމުއްދަތައް ދޫކުރެވިފައި ހުރި ރަށްރަށުގައި އުފައްދާ ދަނޑުވެރިކަމުގެ ބާވަތްތައް ގަތުމަށް ފަހު ބާޒާރާ ހަމައަށް ފޯރުކޮށް ދިނުމުގައި އެގްރޯނެޓްގެ އެހީތެރިކަން އިތުރަށް ހޯދޭނެ ގޮތްތަކާ ގުޅޭ ގޮތުންވެސް މަޝްވަރާ ކުރައްވާފައި ވެއެވެ.
މީގެ އިތުރުން ދަނޑުވެރިން އުފައްދާތަކެތި ބާޒާރާ ހަމައަށް ގެންދިއުމުގައި ދިމާވާ ގޮންޖެހުންތަކަށް ޙައްލު ހޯދުމާއި، އެކި ސަރަހައްދުތަކުން ވައިގެ މަގުން އެތަކެތި އުފުލުމުގައި ޚާއްސަ ލުއިގޮތްތަކެއް ހަމަޖައްސައި ދިނުމަށް ރަށްރަށުގައި ދަނޑުވެރިކަން ކުރާ ފަރާތްތަކުން އެދެމުންދާތީ އެކަމުގައި މަސައްކަތްތަކެއް ކުރައްވަމުން ގެންދަވާކަމަށް ވެސް މިނިސްޓަރ ޑރ. ރަމީލާ ވިދާޅުވިއެވެ.
