ރާއްޖެއަށް މިހާރު ކުރަމުންދާ ވިއްސާރައިގާ މާލޭގައި މިއަދު އާދަޔާ ޚިލާފަށް ފެންބޮޑުވުމާއި ގުޅިގެން މީހުން ދިރިއުޅޭ ބައެއް ގޭގެއާއި، ފިހާރަތައް ފަދަ ތަންތަނަށް ފެންވަނުން ފަދަ ޙާދިސާތައް ހިނގާފައި ވާތީ، އެފަރާތްތަކަށް އެހީތެރިކަން ފޯރުކޮށްދެއްވުމުގައި ވެމްކޯގެ ވެރިންނާ މުވައްޒަފުން ނަމޫނާ ދައްކައިފިއެވެ.
ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އާއި ގުޅިގެން ކުރެވުނު މަސައްކަތްތަކުގައި ވެމްކޯގެ މުވައްޒަފުން ވަނީ ޢަމަލީ ގޮތުން ބައިވެރިވެފައި ވެއެވެ. އެގޮތުން ވެލިގޯނި ޖެއްސުމާ ގޭގޭ ގައި ހިފާގެންގުޅޭ ސާމާނާއި މުދަލަަށް ލިބިދާނެ ގެއްލުންތައް ކުޑަކުރުމަށް ކުރެވެން ހުރި މަސައްކަތްތައް ކުރުމުގައި ރައްޔިތުންނަށް ބޭނުންވި އެހީތެރިކަން ފޯރުކޮށްދެއްވާފައި ވެއެވެ.
މާލެއަށް ބޯކޮށް ވާރޭ ވެހެމުންދިޔަ އިރު ވެމްކޯގެ މުވައްޒަފުން ތިބީ ރައްޔިތުންނަށް ބޭނުންވި އެހީތެރިކަން ފޯރުކޮށްދެއްވުމަށް ތެމިގެން މަސައްކަތުގައި މަގުމަތީގައެވެ. ވިއްސާރަ އާއި ގުޅިގެން މާދަމާ އަކީ ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ވަނީ ނިންމަވާފައެވެ.
