ރާއްޖޭގެ ދަނޑުވެރިކަމުގެ ސިނާއަތަކީ ބަރޯސާވެވޭ އިޤްތިޞާދީ ސިނާއަތެއްގެ ގޮތުގައި ތަރައްޤީ ކުރުމަށް އެމްޑީޕީގެ ސަރުކާރުން އުފައްދަވާފައިވާ ކުންފުނި ކަމުގައިވާ އެގްރޯނެޓް އުވާލެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
ދިވެހިރާއްޖޭގެ ހީނަރުވެފައިވާ އިޤްތިޞާދީ ޙާލަތު ރަނގަޅު ކުރުމަށްޓަަކައި ސަރުކާރުން ދަނީ މަސައްކަތްތަކެއް ކުރައްވަމުންނެވެ. އަދި އެކަމަށްޓަކައި ދައުލަތުގެ ކުންފުނިތައް ހިންގުމަށް ވަނީ ބޮޑެތި ބަދަލުތަކެއް ގެންނަވާފައެވެ. އިޤްތިޞާދާ ބެހޭ ވުޒާރާއިން ކެބިނެޓަށް ހުށަހެޅުއްވި ކަރުދާހަށް ކެބިނެޓުގައި މަޝްވަރާ ކުރެއްވުމަށް ފަހު، އެގްރޯނެޓް އުފާލުމަށާއި، އެކުންފުނިން ކުރަމުން ގެންދާ މަސައްކަތްތައް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑާ ޙަވާލު ކުރެއްވުމަށް ވަނީ ނިންމަވާފައެވެ.
ސަރުކާރުން އެގްރޯނެޓް އުވާލެއްވުމަށް ނިންމަވާފައި ވާއިރު، އެކަމާ ގުޅޭ އެއްވެސް މަޢުލޫމާތެއް އެގްރޯނެޓްގެ ކުރީގެ ބެލެނިވެރި ފަރާތްކަމުގައިވާ ފަންޑް މެނޭޖްމަންޓް ކޯޕަރޭޝަނަށް ލިބިފައި ނެތްކަމަށް މަޢުލޫމާތު ލިބެއެވެ. ވޭތުވެދިޔަ 5 އަހަރު ދުވަހުގެ ތެރޭގައި އެގްރޯނެޓުން ގިނަ ގުނަ މަސައްކަތްތަކެއް ވަނީ ކޮށްފައެވެ. އެގޮތުން 9 ކޯލްޑް ސްޓޯރޭޓް ފެސިލިޓީ ޤާއިމްކޮށް، 65 ފޫޓުގެ އެގްރިބޯޓެއް ޒަމާނީ ވަޞީލަތްތަކާއެކު ވަނީ ބަނދެ ނިންމާފައެވެ.
ދަނޑުވެރިންގެ އުންމީދުތަކާ ގުޅިފައިވާ އެގްރޯނެޓް އުވާލެއްވުމުން ދެން އެމަސައްކަތްތައް ތަރުތީބުވެގެން ދާނެ ގޮތަކާ މެދު ރާއްޖޭގެ ދަނޑުވެރިންނާ އެކުންފުނީގައި މަސައްކަތް ކުރައްވާ މުވައްޒަފުން ކަންބޮޑުވެފައި ވާކަމުގެ މަޢުލޫމާތުތަކެއް ލިބެއެވެ.
