ސަރުކާރު ހިއްސާވާ ކުންފުނިތައް މެދުވެރިކޮށް ދޭ ސަބްސިޑީގެ ގޮތުގައި ތިން މަސް ދުވަހުގެ ތެރޭގައި 1.2 ބިލިއަން ރުފިޔާ ކުންފުނިތަކަށް ދޫކޮށްފައި ވާކަމަށް ޕީސީބީގެ ތަފާސްހިސާބުތަކުން ހާމަވެއްޖެއެވެ. އޭގެ ތެރޭގައި ހިލޭ އެހީގެ ގޮތުގައި 60 މިލިއަން ރުފިޔާ ދޫކޮށްފައި ވާކަމަށާއި، ކުންފުނިތަކުގެ ހިންގުމުގެ ޚަރަދުތައް ހަމަޖެއްސުމަށް ކެޕިޓަލް އިންޖެކްޝަންގެ ގޮތުގައި 164 މިލިއަން ރުފިޔާ ދޫކޮށްފައި ވާކަމަށެވެ.
ކުންފުނިތަކުގެ ހިންގުމުގެ ޚަރަދުތައް ހަމަޖެއްސުމަށް އެންމެ ބޮޑު ހޭދައެއް ކޮށްފައި ވަނީ އެޗްޑީސީ އާއި އާރްޑީސީ އަދި މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އަށެވެ. އެގޮތުން އެޗްޑީސީއަށް 84 މިލިއަން ރުފިޔާ، އާރްޑީސީއަށް 24 މިލިއަން ރުފިޔާ އަދި އެމްއެފްއެމްސީއަށް 28 މިލިއަން ރުފިޔާ ދޫކޮށްފައި ވެއެވެ.
ސަބްސިޑީގެ ގޮތުގައި އެންމެ ބޮޑު އަދަދެއްގެ ފައިސާ ދޫކޮށްފައި ވަނީ އެޗްޑީސީއަށެވެ. އެގޮތުން އެޗްޑީސީއަށް ވަނީ 400 މިލިއަން ރުފިޔާ، އެސްޓީއޯއަށް 360 މިލިއަން ރުފިޔާ އަދި ފެނަކަ އަށް 250 މިލިއަން ރުފިޔާ ދޫކޮށްފައި ވެއެވެ.
ފަންޑް މެނޭޖްމަންޓް ކޯޕަރޭޝަނަށް 28 މިލިޔަން ފުރިޔާ ހިންގުމުގެ ޚަރަދުތައް ހަމަޖެއްސުމަށް އިތުރަށް ދޫކޮށްފައި ވާއިރު، އެކުންފުނީގެ ބެލެނިވެރިކަމުގެ ދަށުގައި އޮތް އެގްރޯނެޓަށް އެއްވެސް ކަމެއް ކުރެވޭނެ ފައިސާ ހަމަނުޖެހިގެން މަސައްކަތްތައް ހުއްޓިފައި އޮތުމުން އެކުންފުނި ވަނީ އުވާލާފައެވެ.
