އަތޮޅު ކައުންސިލުން އިންތިޒާމްކުރާ ށ. އަތޮޅު ޤުރުއާން މުބާރާތް ފެށިއްޖެއެވެ. އަތޮޅުގެ ހުރިހާ ރަށެއްގެ ސްކޫލް މަދަރުސާތަކަށް ބައިވެރިވުމުގެ ފުރުޞަތު ހުޅުވާލެވޭ މި މުބާރާތަކީ އަތޮޅުގައި ބޭއްވޭ މިފަދަ އެންމެ ބޮޑު ޤުރުއާން މުބާރާތެވެ.
ސެޕްޓެމްބަރު 19 އިން 21 އަށް ކުރިއަށްދާ މި މުބާރާތުގައި އަތޮޅުގެ 12 ސްކޫލަކުން ޖުމުލަ 105 ދަރިވަރުން ބައިވެރިވާކަމާއި، މިއީ މިހާތަނަށް އެންމެ ގިނަ ދަރިވަރުން ބައިވެރިވާ މުބާރާތްކަމުގައި ށ. އަތޮޅު ކައުންސިލުން މަޢުލޫމާތު ދެއެވެ.
އަދި މިއީ އަތޮޅު ކައުންސިލުން ބާއްވާ އެންމެ ޚާއްޞަ މުބާރާތްކަމަށާއި، މިއީ ވަރަށް ދިގު ތާރީޚެއް އޮތް މުބާރާތެއް ކަމުގައި ވެސް އެކައުންސިލުން މަޢުލޫމާތު ދެއެވެ. އެގޮތުން 1990 ވަނަ އަހަރުން ފެށިގެން ކޮންމެ އަހަރަކު ވެސް މި މުބާރާތް ބާއްވަމުން އަންނަ ކަމަށާއި، ކުރިން އިސްލާމިކް މިނިސްޓްރީގެ އެހީތެރިކަމުގައި ބާއްވަމުން އައި މި މުބާރާތް މިހާރު އިންތިޒާމުކުރަނީ ސީދާ އަތޮޅު ކައުންސިލުން ކަމަށެވެ.
މި މުބާރާތުގައި ވާދަކުރާ ސްކޫލްތަކުގެ ތެރެއިން އެއްވަނަ ސްކޫލަށް 15،000 ރުފިޔާ، ދެވަނަ ސްކޫލަށް 10،000 ރުފިޔާ އަދި ތިންވަނަ ސްކޫލަށް 7،000 ރުފިޔާގެ ފައިސާގެ އިނާމް ހުށަހެޅިފައި ވެއެވެ. އަދި އެންމެ މޮޅު ދަރިވަރަށް ޢުމްރާ ދަތުރެެއް ލިބޭނެއެވެ.
މުބާރާތަކީ ވަރަށް ގިނަ ފަރާތްތަކެއްގެ ދީލަތި އެހީތެރިކަމާއެކު ބޭއްވޭ މުބާރާތެކެވެ. އެގޮތުން މިއަހަރުގެ މުބާރާތް ސްޕޮންސަރ ކޮށްދެއްވަނީ ދިރާގާއި، އިސްލާމިކް ބޭންކްގެ އިތުރުން ފަރީ ޙައްޖު އެންޑް ޢުމްރާ ގްރޫޕް ހިމެނެއެވެ.
