ފޯކައިދޫގައި ކުރިއަށްދާ މީ އޭ މައިލޯ ފުޓްސަލް ޓޯނަމަންޓް 2024 ގައި ވާދަކުރާ ބީ.އެލް.ބީ ފުޓްސަލް ޓީމުން އެޓީމުގެ ފުރަތަމަ މެޗު ކާމިޔާބުކޮށްފިއެވެ. މިއަދު ހަވީރު ފޯކައިދޫ ރަސްމީ ފުޓް ބޯޅަ ދަނޑުގައި ކުރިއަށް ދިޔަ މިމެޗު ބީ.އެލް.ބީ ޓީމުން ކާމިޔާބުކޮށްފައިވަނީ 0-10 ލަނޑުންނެވެ. މިމެޗުގެ އެންމެ މޮޅުކުޅުންތެރި އަކީ ބީ.އެލް.ބީ ޓީމުގެ ޖޯޒީ ނަމްބަރު 11 މާން ޞަބީހްއެވެ.
ގްރޫޕް ސްޓޭޖް ގެ މިމެޗު ބީ.އެލް.ބީ ޓީމުން ކާމިޔާބުކުރީ ރިޓަޔާޑް އެފްސީ ޓީމާއި ވާދަކޮށެވެ. މި މެޗުގައި ދެޓީމުން ވެސް ވަނީ ރަނގަޅު ކުޅުމެއް ދައްކާފައެވެ. ބީ.އެލް.ބީ ޓީމުގެ ރިފްގާން މުހައްމަދު 4 ލަނޑު އަދި ދެ އެސިސްޓު ހަދާފައިވާއިރު އިފްޝާން ރަޝީދު ގެ ހިތްގައިމު ދެ ލަނޑު ފެނިގެންދިޔައެވެ. އަދި ނަޒާން ނަބީލް 1 ލަނޑު ޖަހާފައިވާއިރު މި މެޗުގައި މޮޅު ކުޅުމެއްދެއްކި މާން ޞަބީހް ވަނީ 3 ލަނޑާއި 3 އެސިސްޓް ކާމިޔާބުކޮށްދީފައެވެ.
މި މުބާރާތް ފެށުމުގެ ގޮތުން ވަނީ ކުލަގަދަ އޯޕަނިން ސަރަމަނީއެއް ބާއްވާފައެވެ. އެގޮތުން މުބާރާތުގައި ވާދަކުރާ 8 ޓީމުން ވަނީ އެޓީމުތަކުގެ ޖާޒީ ދައްކާލާފައެވެ. މި މުބާރާތުގެ ޝަރަފްވެރިމެހެމާން އަލްފާޟިލް އަހްމަދު އިޔާޒް ވަނީ ފެށުމުގެ ރަސްމިއްޔާތުގައި ބައިވެރިވެ މުބާރާތް ފައްޓަވައިދެއްވާފައެވެ.
މީ އޭ މައިލޯ ފުޓްސަލް ޓޯނަމަންޓަކީ ފޯކައިދޫގައި ބާއްވާ އެންމެ ފޯރިގަދަ ފުޓްސަލް އެއް މުބާރާތެވެ. މިއަދުގެ މެޗު ކުރިއަށްދިޔައިރު ގިނަ އަދަދެއްގެ ސަޕޯޓަރުން މެޗު ބެލުމަށްޓަކައި ވަނީ ދަނޑަށް ހާޒިރުވެފައެވެ.
މި މުބާރާތުގެ ދެ މެޗެއް މާދަމާ ހަވީރު ކުރިއަށްދާނެއެވެ. އެގޮތުން މާދަމާ ހަވީރު 16:15ގައި ބައްދަލުކުރާނީ ޑީ.އެމް.ޓީ އަދި ވައިޓް ރައިޑާސްއެވެ. މުބާރާތުގެ ތިންވަނަ މެޗުގައި މާދަމާ ހަވީރު 17:15 ގައި ބައްދަލުކުރާނީ އަލަސްކާ ސްޕޯޓްސް އަދި ކޭޑީ ޕާކެވެ. މި މެޗުތައް ވެސް މީ އޭ މައިލޯ ފޭސްބުކް ބޭޖުން ލައިވްކުރާނެއެވެ.
