ފޯކައިދޫގައި ކުރިއަށްދާ މީ އޭ މައިލޯ ފުޓްސަލް ޓޯނަމަންޓް 2024 ގެ ދެވަނަ މެޗުގައި ބައްދަލުކުރީ ވައިޓްރައިޑާސް އަދި ޑީ.އެމް.ޓީ އެވެ. ފޯރިގަދަ ކުޅުމަކަށްފަހު ވައިޓް ރައިޑާސް ޓީމުން އެޓީމުގެ ފުރަތަމަ މެޗު ކާމިޔާބުކޮށްފިއެވެ. މިއަދު ހަވީރު ފޯކައިދޫ ރަސްމީ ފުޓް ބޯޅަ ދަނޑުގައި ކުރިއަށް ދިޔަ މިމެޗު ވައިޓް ރައިޑާސް ޓީމުން ކާމިޔާބުކޮށްފައިވަނީ 1-3 ލަނޑުންނެވެ.
މިމެޗުގެ އެންމެ މޮޅުކުޅުންތެރި އަކީ ވައިޓް ރައިޑާސް ޓީމުގެ ޖޯޒީ ނަމްބަރު 07 މުހައްމަދު ރިޝްވާންއެވެ. މި މެޗުގައި ވައިޓް ރައިޑާސް އަށް މުހައްމަދު ރިޝްވާން ވަނީ ދެ ގޯލު ކާމިޔާބުކޮށްދީފައެވެ. މި މެޗުގައި ވައިޓް ރައިޑާސް އަށް ދަގޭ ވަނީ ގޯލެއް ކާމިޔާބުކޮށްދީފައެވެ. ޑީ.އެމް.ޓީ ޓީމުން ޖެހި ގޯލް އެ ޓީމަށް ކާމިޔާބުކޮށްދީފައިވަނީ ޒުވާން ކުޅުންތެރިޔާ އިޔާން އިސްމާޢިލްއެވެ.
ވައިޓް ރައިޑާސް އަދި ޑީ.އެމް.ޓީ ބައްދަލުކުރި މެޗުގައި ވައިޓްރައިޑާސްގެ ކީޕަރ އަކްރަމް އަށް ވަނީ އަނިޔާވެފައެވެ.
މި މުބާރާތުގެ 3 ވނަ މެޗުގައި ބައްދަލުކުރީ އަލަސްކާ ސްޕޯޓްސް އަދި ކޭޑީ ޕާކެވެ. މި މެޗުގައި ކޭޑީ ޕާކުން ގޯލެއް ޖަހާފައިވަނިކޮށް، އަލަސްކާ ސްޕޯޓްސް އިން ފަހަތުން އަރާ 3 ގޯލު ޖަހާ މެޗުން ވަނީ މޮޅުވެފައެވެ. މި މެޗު އަލަސްކާ ސްޕޯޓްސް އިން ކާމިޔާބުކުރީ 3-1 ލަނޑުންނެވެ. މި މެޗުގެ މޮޅު ކުޅުންތެރިއަކީ އަލަސްކާ ޓީމުގެ ޖާޒީ ނަންބަރ 14 މުހައިމިންއެވެ.
ގްރޫޕް ސްޓޭޖްގައި މިއަދު ކުރިއަށް ދިޔަ ދެ މެޗުގައި ވެސް ޓީމުތަކުން ފޯރިގަދަ އެހާމެ ރީތިކުޅުމެއް ވަނީ ދައްކާފައެވެ. މިއަދުގެ މެޗު ކުރިއަށްދިޔައިރު ވެސް ގިނަ އަދަދެއްގެ ސަޕޯޓަރުން މެޗު ބެލުމަށްޓަކައި ވަނީ ދަނޑަށް ހާޒިރުވެފައެވެ.
މި މުބާރާތުގެ ދެ މެޗެއް މާދަމާ ހަވީރު ވެސް ކުރިއަށްދާނެއެވެ. އެގޮތުން މުބާރާތުގެ ހަތަރުވަނަ މެޗުގައި މާދަމާ ހަވީރު 16:15ގައި ބައްދަލުކުރާނީ އަލަސްކާ ސްޕޯޓްސް އަދި ރިޓަޔާޑް އެފްސީއެވެ. މި މެޗަކީ ރިޓަޔާޑް އެފްސީއަށް ގްރޫޕު ސްޓޭޖުގައި ކުރިއަށް ދިޔުމަށް ވަރަށް މުހިންމު މެޗަކަށް ވެގެންދާނެއެވެ. މުބާރާތުގެ ފަސްވަނަ މެޗުގައި މާދަމާ ހަވީރު 17:15 ގައި ބައްދަލުކުރާނީ އޯ.ބީ.ޓީ އަދި ފަހި އެފްސީއެވެ. މި މެޗަކީ މި ދެޓީމުގެ ވެސް ފުރަތަމަ މެޗެވެ. މި މެޗުތައް ވެސް މީ އޭ މައިލޯ ފޭސްބުކް ބޭޖުން ލައިވްކުރާނެއެވެ.
