ސްރީލަންކާގެ ރިޔާސީ އިންތިޚާބު އެންޕީޕީގެ ރިޔާސީ ކެންޑިޑޭޓް އަނޫރާ ކުމާރަ ދިސަނަޔަކަ ކާމިޔާބުކުރައްވައިފިއެވެ. އަނޫރާ ވެގެންދާނީ ސްރީލަންކާގެ 10 ވަނަ ރައީސަށެވެ.

މިއީ ސްރީލަންކާގެ ތާރީޚްގައި ވެސް އެންމެ ފަރަޤު ކުޑަކޮށް ރިޔާސީ އިންތިޚާބެއް ނިމިގެންދިޔަ ފަހަރެވެ. އިންތިޚާބުގެ ވަގުތީ ނަތީޖާ މިހާރު ވަނީ އިޢުލާންކޮށްފައެވެ. އަނޫރާއަށް ލިބިވަޑައިގަތީ އާންމު ވޯޓުގެ 5،634،915 ވޯޓާ ޕްރެފަރެންޝަލް ވޯޓްގެ 82،056 ވޯޓާ އެކުޖުމުލަ 5،716،971 ވޯޓެވެ. ވާދަވެރި އެސްޖޭބީ ކެންޑިޑޭޓް ސަޖިތް ޕްރަމަދާސައަށް ލިބިވަޑައިގަތީ އާންމު ވޯޓުގެ 4،363،035 ވޯޓާ ޕްރެފަރެންޝަލް ވޯޓުގެ 136،236 ވޯޓާ އެކުޖުމުލަ 4،499،271 ވޯޓެވެ.

އަނޫރާއަކީ ހައްދުފަހަނަ އެޅި ބުދު ދީނުގެ މީހުންގެ އެހީގައި ކާމިޔާބީ ހޯދާ މީހަކަށް ވުމުން މިއީ މުސްލިމުންނަށާއި، ތަމަޅަ މައިނޯރިޓީއަށް ބޮޑު ނުރައްކަލަކަށް ވެދާނެއެވެ. އަދި އަނޫރާ އަކީ ޗައިނާގެ ވިސްނުމަށް ތަބާވާ ފަރާތެއް ކަމުން ދުނިޔޭގެ ބޮޑެތި ބާރުތައް ކަމުގައިވާ އެމެރިކާ އާއި އިންޑިޔާ ފަދަ ޤައުމުތަކާ ދެކޮޅު މީހަކަށް ވާނެކަމަށް ރިޕޯޓްތައް ބުނެއެވެ.