ށ. ފޯކައިދޫ ފެނަކަ ބްރާންޗްގައި މަސައްކަތްކުރާ މުވައްޒަފަކު ވަރަށް ކުއްލިގޮތަކަށް ވަޒީފާއިން ވަކިކޮށް ގެއަށް ފޮނުވާލައިފިއެވެ. މަޢުލޫމާތު ލިބިފައިވާގޮތުގައި އޭނާ ވަޒީފާއިން ވަކިކޮށްފައި ވަނީ އިއްޔެގެ ވަގުތެއްގައެވެ.

ވަޒީފާގެ ރައްކާތެރިކަން ކަށަވަރުކޮށްދެއްވާނެ ކަމުގެ ވަޢުދާއެކު ވެރިކަމަށް ވަޑައިގަތުމަށް ފަހު، މުޅިންވެސް ފެންނަނީ އެވެނިތާކުން މީހެއް މިވެނިތާކުން މީހެއް ކަނޑަމުންދާތަން ކަމަށް ބުނެ ފޯކައިދޫއިން ވާހަކަދެއްކި ބައެއް މީހުންގެ ކަންބޮޑުވުން ފާޅުކުރެއްވި އެވެ. އަދި ފެނަކަ ހިންގުމާ ޙަވާލުވެގެން ހުރި މީހަކީ އެފަދަތަނެއް ހިންގުމުގެ އެއްވެސް ތަޖުރިބާއެއް އަދި ޢިލްމީ ޤާބިލްކަމެއް ވެސް ނެތް މީހެއް ކަމަށާއި، ހުރިހާ ކަމެއް ނިންމަމުން ގެންދަނީ ރަށުގައި އޮތް ސިޔާސީ ބަދަލުހިފުމުގެ ވިސްނުމުގައި ކަމަށެވެ.

މިލައުތުރަށް މަޢުލޫމާތު ލިބިފައިވާ ގޮތުގައި ވަޒީފާއިން ވަކިކޮށްފައި ވަނީ ކޮމަންޑޫ ދާއިރާގެ ކުރީގެ މެންބަރު މަރްޙޫމް ޙުސައިން ވަޙީދުގެ ކޮށްކޮއެއް ކަމަށްވާ ށ. ފޯކައިދޫ ހުވަނދުމާގޭ މުޙައްމަދު ޝަފުރާޒެވެ. އޭނާއަށް ވަޒީފާ ދީފައި ވަނީ 10 އެޕްރީލް 2022 ގައެވެ. އަދި ވަޒީފާއިން ވަކިކޮށްފައި ވަނީ 23 ސެޕްޓެމްބަރ 2024 ގައެވެ.