އީރާން ގާތް ގުޅުމެއް ބާއްވަމުން އަންނަ ހަމާސްގެ ލީޑަރު އިސްމާޢިލް ހަނިއްޔާ އާއި ޙިޒްބު ﷲ ގެ ލީޑަރު ޙަސަން ނަސްރަ ﷲ އާއި އީރާންގެ ރިވޮލިއުޝަނަރީ ގާޑުގެ އިސްކޮމާންޑަރުންތަކެއް ޝަހީދުކޮށްލުމުގެ ބަދަލެއްގެ ގޮތުން ރޭގައި ވަރަށް ކުއްލިގޮތަކަށް އިޒްރޭލަށް ޙަމަލާދިނުމަށް ފޮނުވާލި 250 ބެލެސްޓިކް މިސައިލް އަޔަން ޑޯމްއަކަށް ނުހިފެހެއްޓި ޓާގެޓްތަކަށް އަރައިފިއެވެ.
ރޭގައި އިޒްރޭލްގެ ވެރިރަށް ތައްލަވީވްގެ ތެރެއިން މިސައިލް ސައިރަންގެ އަޑު މެދުނުކެނޑި އިވެމުން ދިޔައެވެ. އަދި މި ޙަމަލާތައް އަމާޒުވީ ކޮންކޮން ތަންތަނަކަށް ކަމެއް ކަށަވަރެއް ނުވެއެވެ. އެހެން ނަމަވެސް އިޒްރޭލްގެ އެއާބޭސްއަކަށް ޙަމަލާތައް އަރާފައި ވާކަމަށާއި، ބޮޑެތި ގެއްލުންތަކެއް ވެސް ލިބިފައި ވާކަމަށް ޚަބަރުތައް ލިބެއެވެ.
އީރާންގެ ޙަމަލާގެ ރައްދެއްގެ ގޮތުން މިރޭގެ ވަގުތެއްގައި އިޒްރޭލުން ރައްދު ޙަމަލާއެއް ދިނުމަށް ތައްޔާރުވަމުން ދާކަމަށް އިޒްރޭލްގެ ބައެއް މީޑިޔާތަކުގައި ރިޕޯޓްކޮށްފައި ވެއެވެ. މެދުއިރުމަތީގެ މަޝްރަޙް ފިނިކުރުމަށްޓަކައި ސަރަޙައްދުގެ ޤައުމުތަކުން އދ. އެކު މަޝްވަރާތައް ކުރަމުން އެބަގެންދެއެވެ. އިޒްރޭލުން ރައްދުގައި ޙަމަލާދީފި ނަމަ ދިގުދެމިގެންދާނެ ހަނގުރާމައެއް ފެށިދާނެކަމަށް ތަޖުރިބާކާރުން ލަފާކުރެއެވެ.
