ގޯވިންދާއަށް އޮޅިގެން އޭނާގެ އަމިއްލަ ގަޔަށް ވަޒަން ޖެހިގެން ހޮސްޕިޓަލުގައި ފަރުވާދޭން ފަށައިފިއެވެ. އޭނާގެ އަތުން ފިސްތޯލަ ވަޒަން ޖެހިފައި ވަނީ ފަޔަށެވެ.
އޭނާގެ އަންހެނުން ސުނީތާ މީޑިޔާއަށް މަޢުލޫމާތު ދެމުން ބުނީ ގޯވިންދާގެ ޙާލު މިހާރު ސްޓޭބަލް ކަމަށާއި، އޮޕަރޭޝަން ކޮށްގެން އޭނާގެ ފަޔަށް ވަތް ވަޒަން ޑޮކްޓަރުން ނަގައިފި ކަމަށާއި، ދެތިން މަސްދުވަސް ފަހުން އަނެއްކާ ވެސް ނަށަން ފަށާނެ ކަމަށާއި، ފޭނުން އޭނާއަށް ހެޔޮ ދުޢާކޮށްދިނުމަށް އެދޭކަމަށެވެ.
ގޯވިންދާ ފިސްތޯލަ ބޭނުންކުރީ ކޮން ޙާލަތެއްގައި ކަމެއް އަދި އެއީ ގޭގާއިތޯ ނޫނީ ފިލްމެއްގެ މަންޒަރެއްގެ ތެރެއިންކަމެއް، ނުވަތަ ޖަންގަލީގެ ޝިކާރަކުރުމެއްގައި ކަމެއް ސާފެއް ނުވެއެވެ. އެހެން ނަމަވެސް ގޯވިންދާ ހޮސްޕިޓަލްގައި އޮވެގެން ދިން އޯޑިއޯ ސްޓޭޓްމަންޓްގައި ބުނާގޮތުން އޭނާ މިހާރު ރަނގަޅު ކަމަށެވެ.
އެހެން ނަމަވެސް ގޯވިންދާ އޭނާގެ ފޭނުންނަށް ދިން މެސެޖުގައި ވެސް އޭނާގެ ގައިގާ އަޅާވޭންތައް އިހުސާސުކުރެވޭ ވަރަށް އަޑުގައި ހުރީ ކޫރުމާއި ތުރުތުރު އެޅުންތައް ހުރިކަން ފާހަގަކުރެވެއެވެ. އެކަމާ ގުޅިގެން ސަޕޯޓަރުން ވަނީ ވަރަށް ބޮޑަށް ކަންބޮޑުވެފައެވެ. އަދި ޙަޤީޤަތުގައި ވެސް ގޯވިންދާގެ ސިއްޙީ ޙާލަތު ރަނގަޅުތޯ ބައެއް މީހުން ސުވާލުކުރަމުން އެބަގެންދެއެވެ.
