ދުނިޔޭގައި ފަތުރުވެރިކަމަށް އެންމެ މަޝްހޫރު އެންމެ ބޮޑު ބްރޭންޑަކީ ދިވެހިރާއްޖެ ކަމަށްވެފައި، ޖުމުލަ އާބާދީގައި ބައިމިލިޔަން ކިރިޔާ ހަމަވާ ޤައުމެއްގައި ޑޮލަރުގެ ތާށިކަން އޮތުމަކީ ޙަޤީޤަތުގައި ވެސް ވަރަށް ބޮޑު އަރަތެކެވެ. އެހެން ނަމަވެސް ޑޮލަރުގެ މައްސަލަ ޙައްލުކުރުމަށް ރަނގަޅު ޤާނޫނީ އޮނިގަނޑެއް ނެތި، ޤަވައިދެއްގެ ދަށުން ދަނޑިމާރުއެޅުމަކީ އިޤްތިޞާދީ ހެލުންގަނޑެއްގެ އިތުރުން ސިޔާސީ ހަލަބޮލިކަމެއްގެ ތެެރެއަށް ޤައުމު ވެއްޓިދާނެކަމެއްގެ ގޮތުގައި ތަޖުރިބާކާރުން ސިފަކުރަން ފަށައިފިއެވެ.

ސަރުކާރުން ވަރަށް ކުއްލިގޮތަކަށް ގެނައި ބަދަލާއެކު ފަތުރުވެރިންނަށް ޚިދުމަތްދޭ ތަނަކުން ވިއްކާ މުދަލާއި ޚިދުމަތުން ރާއްޖެއަށް ވަންނަ ހުރިހާ ބޭރު ފައިސާއެއް ރާއްޖޭގެ ބޭންކަކަށް ޖަމާކުރުން ވަނީ ލާޒިމުކޮށްފައެވެ. އަދި ޓޫރިސްޓް ރިސޯޓްތަކާއި، ހޮޓާތަކާއި، ސަފާރީތަކަށް އަންނަ ކޮންމެ ފަތުރުވެރިޔަކު މަދުވެގެން 500 ޑޮލަރާއި، ކޮންމެ ގެސްޓްހައުސް އަކަށް އަންނަ ފަތުރުވެރިޔަކަށް 25 ޑޮލަރު ޖެހޭގޮތަށް ކޮންމެ މަހެއްގެ ޖުމުލަ ޓޫރިސްޓުންނަށް އަރާ އަދަދު ރާއްޖޭގެ ބޭންކަކަށް މާރުކުރުން ވެސް ވަނީ ލާޒިމުކޮށްފައެވެ.

އަހަރަކު 4 ބިލިޔަން ޑޮލަރު ވަންނަ ފަތުރުވެރިކަމުގެ ޞިނާޢަތެއް އޮތް ކުޑަ ކުޑަ ދިވެހިރާއްޖޭގައި ޑޮލަރުގެ ތާށިކަން އޮވެދާނެކަމަށް އެއްވެސް އަވައްޓެރި ޤައުމެއްގެ މީހަކުވެސް ޤަބޫލެއް ނުކުރެއެވެ. އަދި ޑޮލަރާ އަޅާބަލާއިރު ނިސްބަތުން ދިވެހި ރުފިޔާގެ އަގު މަތިކަމުން ބައެއް މީހުން ހައިރާންވެއެވެ. އެހެން ނަމަވެސް ޙަޤީޤަތަކީ ރާއްޖޭގައި އަބަދުވެސް ޑޮލަރުގެ ތާށިކަން އޮވެއެވެ. ރާއްޖޭގެ ރައްޔިތުންނާއި، ވިޔަފާރިތަކަށް ބޭނުންވާ މިންވަރަށް އެއްވެސް އިރެއްގައި ފަސޭހަކަމާއެކު ޑޮލަރު ލިބޭނެގޮތެއް ނުވެއެވެ.

ސުވާލަކީ މިހެން މިވަނީ ކީއްވެގެންތޯއެވެ؟

އިޤްތިޞާދީ ތަޖުރިބާކާރުން ދެކިލައްވާގޮތުގައި މިއީ ޑޮލަރު ވަންނަ ހިސާބުން ދިމާވެެގެން އުޅޭ މައްސަލައެއް ނޫނެވެ. ދިވެހިރާއްޖޭގެ ފަތުރުވެރިކަމުގެ ޞިނާޢަތު ބައްޓަންކުރެވިފައި އޮތް ގޮތުން ދިމާވާ މައްސަލައެކެވެ. އެހެނީ ރާއްޖޭގެ ފަތުރުވެރިކަމުގެ ޞިނާޢަތަކީ ބޭރުގެ އިންވެސްޓަރުންނަށް ފަހިވާގޮތަށް، ޤައުމަށް ނިކަމެތިވާގޮތަށް އުފަންވެ ތަރައްޤީވަމުން އަންނަ ޞިނާޢަތެކެވެ. އެއީ ދުނިޔޭގެ ފަތުރުވެރިކަމުގެ ބާޒާރުގައި ރާއްޖެއަށް ފައިހަމަކޮށްލުމަށް އޮތް ހަމައެކަނި ގޮތްކަމުގައި ބަޔަކަށް ޤަބޫލުކުރެވިގެން އެކަން ތަރުތީބު ކުޅަ ގޮތެވެ. މިއަދު ކުއްލިއަކަށް ރާއްޖޭގެ ބެންކުތަކަށް ޑޮލަރު އަޅަން މަޖުބޫރު ކުޅަޔަސް ރާއްޖޭގެ ބެންކުތައް ޑޮލަރުން ފުރޭނެކަމަށް ހިސާބެއް ޖެހުމަކީ މޮޔަކަމެކެވެ. އެއީ އަދި މިއޮތް ގޮތުން މުސްތަޙިއްލު ކަމެކެވެ.