ރައްޔިތުންގެ މަޖިލިސް 2024 އަށް މެންބަރުން ހޮވުމަށް ބޭއްވި އާންމު އިންތިޚާބުގެ ކެމްޕެއިން ދުވަސްވަރު ރ. އަތޮޅު އަލިފުއްޓަށް ގެންދިޔަ ސްޕީޑް ލާންޗާއި އަޅާލާނެ މީހަކު ނެތި އެރަށުގެ ފަޅުތެރޭގައި އޮވެ ވީރާނާ ވާތީ އާންމުން ކަންބޮޑުވުން ފާޅުކޮށްފިއެވެ.
މިނޫހަށް މަޢުލޫމާތު ލިބިފައިވާގޮތުން އެ ލާންޗަކީ ކުރީ ސަރުކާރުން ހޮސްޕިޓަލްތަކުގައި އައުޓްރީޗް ޕްރޮގްރާމް ހިންގުމަށް ހޯދައިފައިވާ ލާންޗު ތަކުގެ ތެރެއިން ރ. އުނގޫފާރު ރީޖަނަލް ހޮސްޕިޓަލަށް ދީފައުވާ ލާންޗު ކަމަށް ވެއެވެ. އެ ލާންޗް ފަޅުތެރޭގައި އޮވެ ފެހިޖަހާ ބަރުވެފައިވާއިރު، މިހާރު ބަނޑުފިލާގައި ގާފޮރިވެސްވަނީ ޖަހާފައެވެ.
އެ ލާންޗް ބެލެހެއްޓުމަށްޓަކައި އަލިފުށީ ސިއްހީމަރުކަޒުން އެއްވެސްކަމެއް ކޮށްފައެއް ނުވެއެވެ. މިހާތަނަށް އެ ލާންޗުގައި ބަލިމީހުން އުފުލުމަށް ދެތިން ފަހަރެއްގެ މަތިން ދަތުރުކުރުން ފިޔަވައި ހަމަ އެއްވެސް ބޭނުމެއް ހިފާފައެއް ނުވެއެވެ. އެހެންކަމުން އަލުން އެ ލާންޗް ފެހިކަހާ ގާފޮރިނެއްޓުމަށް ވެސް އެތައްލައްކަ ރުފިޔާއެއް ޚަރަދުވާނެ ކަމަށް އަންދާޒާކުރެވެއެވެ.
މިއީ ދަޢުލަތުގެ މުދާ ބަލަހައްޓަން ވާނެގޮތް ނޫންކަމަށާއި، މިފަދަ އަގު ބޮޑު މުދާ އެއްވެސް ބެލުންތެރިކަމެއް ނެތި އެހެން ދޫކޮށްލާފައި އޮތުމަކީ ވަރަށް ބޮޑު އިހުމާލެއް ކަމަށް އަލިފުށިން ވާހަކަދެއްކި މީހަކު ބުންޏެވެ. މިކަމާ ގުޅޭގޮތުން އަލިފުށީ ޞިއްޙީމަރުކަޒަށް ގުޅާލުމުން ފޯނަށް ޖަވާބު ނުދެއްވާތީ މަރުކަޒުގެ ބަހެއް ލިބޭގޮތް ވަނީ ނުވެފައެވެ.
