ދިވެހިރާއްޖޭގައި އުފައްދާ ކާބޯތަކެތީގެ ބާވަތްތައް ރައްކާތެރިކަމާއެކު އެއްތަނުން އަނެއްތަނަށް އުފުލުމަށްޓަކައި އެގްރޯ ނޭޝަނަލް ކޯޕަރޭޝަނުން ތަރައްޤީކުރި އެގްރިބޯޓް ތަޢާރަފުކުރީ އިއްޔެ ހަވީރު ހުޅުމާލޭގައި ބޭއްްވި އެކަމަށް ޚާއްޞަ ޙަފުލާއެއްގައެވެ.

އެގްރިބޯޓަކީ ޔޫއެންޑީޕީ މެދުވެރިކޮށް އެގްރޯނެޓަށް ލިބިފައިވާ ޖަޕާނު ސަރުކާރުގެ ހިލޭ އެހީއެއްގެ ދަށުން ތަރައްޤީކުރެވިފައިވާ ބޯޓެކެވެ. މިބޯޓް ފަރުމާކޮށްދެއްވައި ކޮންސަލްޓްކޮށްދެއްވީ މެރިން ޕޮލިސްގެ ސީއެސްއާރު ސިޔާސަތުގެ ދަށުން ހިލޭ ސާބަހަށް ފުލުހުންގެ އިދާރާގެ ފަންނީ ބޭފުޅުންނެވެ. އަދި ބޯޓް ބަނުމުގެ މަސައްކަތްކޮށްފައި ވަނީ ޓެންޑަރ ޢުޞޫލުން ފިކްސް އިން މެރިން ޕްރައިވެޓް ލިމިޓެޑާ ޙަވާލުކޮށްގެންނެވެ. މިއީ މުޅިން އަލަށް ބަނދެފައިވާ މުދާއުފުލާ ތަފާތު ފަރުމާއެއްގެ ސައްތައިން ސައްތަ ދިވެހި އުފެއްދުމެކެވެ. ބޯޓް ބަނދެ ނިންމާފައި ވަނީ ކ. ހުރާގައި އޮންނަ ފިކްސިން މެރިންގެ ކޮމާޝަލް ބޯޓްޔާޑުގައެވެ. އެއީ ދިވެހިރާއްޖޭގައި އެފަދަ މަސައްކަތްކުރާ އެންމެ ބޮޑު އެއް ކުންފުންޏެވެ. މިއީ ގާތްގަނޑަކަށް 10،000،000.00 ރުފިޔާ ޚަރަދުކޮށްގެން ބަނދެފައިވާ ވަރަށް ޒަމާނީ ބޯޓެކެވެ.

ބޯޓް އިފްތިތާޙް ކުރުމުގެ ޙަފުލާގެ ޝަރަފުވެރި މެހެމާނަކީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވަޒީރު އާދަމް ޝަރީފު ޢުމަރު އެވެ. މި ޙަފުލާގައި ވާހަކަފުޅު ދައްކަވަމުން ވަޒީރު ވިދާޅުވީ އެގްރިބޯޓާއެކު ކާބޯތަކެތީގެ ރައްކާތެރިކަން ކަށަވަރުވެގެންދާނެ ކަމަށެވެ.  ވަޒީރު މިފަދައިން ވިދާޅުވީ އެގްރިބޯޓު ތައާރަފުކުރުމަށް ހުޅުމާލޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. އެ ރަސްމިއްޔާތުގައި އެގްރިބޯޓު ރަސްމީކޮށް އިފްތިތާޙް ކޮށްދެއްވީ ވަޒީރު އާދަމް ޝަރީފު ޢުމަރެވެ.

މިއީ ކުރީގެ ރައީސް އިބްރާހީމް ޞާލިޙްގެ ޒަޢާމަތުގައި މަސައްކަތް ފަށައި އެއްކޮށް ނިންމާފައިވާ މަސައްކަތެކެވެ. އެގްރޯ ނޭޝަނަލް ކޯޕަރޭޝަން އަކީ ވެސް ކުރީ ސަރުކާރުން އުފެއްދެވި ކުންފުންޏެކެވެ. ނަމަވެސް މިސަރުކާރުގެ އިސްލާޙީ ސިޔާސަތުގެ ދަށުން މިހާރު ވަނީ އެގްރޯނެޓް އުވާލަން ނިންމަވާފައެވެ. އެހެންކަމުން އެގްރިބޯޓް އިފްތިތާޙް ކުރުމުގެ ރަސްމިއްޔާތުގައި އެގްރޯނެޓްގެ ނަންވެސް ފެންނާކަށް ނެތެވެ. އަދި އެގްރޯނެޓަށް އެއްވެސް ދައުރެއް ވެސް ދީފައެއް ނެތެވެ. ހުރިހާކަމެއް އިންތިޒާމުކޮށް ހިންގާފައި ވަނީ ޔޫއެންޑީޕީ މޯލްޑިވްސްގެ ފަރާތުންނެވެ. އެގްރޯނެޓްގެ މުވައްޒަފުން ރަސްމިއްޔާތަށް ގޮސްފައި ވަނީ ދަޢުވަތު ލިބިގެންދާ އެހެންވެސް މެހެމާނުން ފަދައިން ކަމަށް ޙަފުލާގައި ބައިވެރިވި އެގްރޯނެޓްގެ ވަރަށް ސީނިޔަރ މުވައްޒަފަކު ވިދާޅުވިއެވެ.