މިހާރު މުޅި ރާއްޖޭގައި ވެސް އޮތް އެންމެ ޙަރަކާތްތެރިި ރަށު ކައުންސިލަކީ ފޯކައިދޫ ކައުންސިލްއޭ ބުނުމަކީ އެހެން ކައުންސިލްތަކަށް ބުނެވޭ ކުޑައިމީސް ބަހަކަށް ނުވާނެތެވެ. ރަށުގެ ތަރައްޤީއަށް އެމީހުން ނުކުރާކަށް ވަކި ކަމެއް ނެތެވެ. އިންސާނީ ވަޞީލަތްތަކާއި، ސައިންސާއި ޓެކްނޮލޮޖީގެ ދާއިރާ އާއި، ޢުމްރާނީ ތަރައްޤީ އާއި، ވިޔަފާރިޔާ އިޤްތިޞާދުގެ އިތުރުން ތިމާވެށީގެ ދާއިރާއިން ވެސް އެތަކެއް މަޝްރޫޢެއް ހިންގަމުން އެބަ ގެންދެއެވެ.
ޕްރޮގްރެސިވް ކޯލިޝަން ސަރުކާރަށް އަދި އެއްވެސް ކަމެއް ނުކޮށްދެވޭ ހިނދު، އެމްޑީޕީ ކައުންސިލުން މިފަދަ މުހިންމު މަސައްކަތްތައް ކުރަމުން ގެންދާތީ، އެކަން ކަން ހުއްޓުވުމަށްޓަކައި ނުހަނު ފިއްތުންތައް ކުރިމަތި ކުރުވާ ކަމަށް ވެސް ވެއެވެ. އެގޮތުން ޕީއެންސީ ފޯކައިދޫ ގޮފީގެ އިސްވާރުންގެ ފަރާތުން ސިޔާސީ ގޮތުން ފިއްތުންތައް ކުރިމަތިކޮށް މަސައްކަތްތައް ހުއްޓުވާލަން އުޅޭކަމަށް މަޢުލޫމާތު ލިބެއެވެ. އެހެން ނަމަވެސް ފޯކައިދޫ ކައުންސިލް އޮތީ ރައްޔިތުންނަށް ބޭނުންވާ އެންމެހާ ކަމެއް ކުރުމުގައި ފަހަތައް ޖެހޭގޮތަކަށް ނޫނެވެ.
ރަށުގެ މަލަމަތި ރީތިކޮށް، ގޮނޑުދޮށާއި ހޭޅި ޙިމާޔަތްކޮށް، ރަށް ފެހިކުރުމުގެ ޕްރޮގްރާމްގެ ދަށުން ބަނދަރުގެ ދެކުނުކޮޅު ޒިޔާރަތްމަގުން ފެށިގެން ދެލިއޮޅިބީޗާ ހަމަޔަށް ގިނަ އަދަދެއްގެ ކުރެދި، ހަލަވެލި، ދިއްގާ، ހިރުނދު، މަގޫ، ބޯށި، ފިތުރޯނާއި، ބޯކެޔޮގަހާއި ރުއް ވަނީ އިންދާފައެވެ.
