ށ. އަތޮޅުގައި ބާއްވާ އެންމެ ބޮޑު އަދި އެންމެ ފޯރިގަދަ ހޭންޑްބޯޅަ މުބާރާތްކަމަށްވާ މިލައުތުރު ހޭންޑްބޯޅަ މުބާރާތުގައި ފޯކައިދޫ ޓީމުން ކުޅޭ ފުރަތަމަ މެޗަށް މިއަދު ނިކުންނަނީ ޔަޤީންކަމާ އިތުބާރާއެކު މޮޅުވާންކަމަށް އެޓީމުން ބުނެފިއެވެ.
މިލައުތުރު އޮންލައިންއާ ވާހަކަދައްކަވަމުން އެޓީމުގެ މެނޭޖަރ ޢަލީ ޒުހޫރު ވިދާޅުވީ ފޯކައިދޫ ޓީމް އޮތީ “މެންޓަލީ ވެސް، ފިޒިކަލީ ވެސް” ވަރަށް ފުރިހަމައަށް ތައްޔާރުވެފައި ކަމަށާއި، ފުރަތަމަ މެޗަަށް ނިކުންނަނީ 3 ޕޮއިންޓް ޔަޤީންކުރުމަށް ކަމަށެވެ. އަދި އިތުރަށް ވިދާޅުވީ މިއީ ފަހުގެ ތާރީޚެއްގައި ފޯކައިދޫއިން ނެރޭ އެންމެ ވަރުގަދަ ހޭންޑްބޯޅަ ސްކޮޑް ކަމަށާއި، ހުނަރުވެރި މޮޅު ކުޅުންތެރިންތަކެއް ތިބި ފަހަރެއް ކަމަށެވެ.
ފޯކައިދޫ އަކީ މުބާރާތް ހޯސްޓްކުރާ ދެރަށުން ކުރެ އެއް ރަށް ކަމަށްވެފައި މިއަދުގެ މެޗް އޮންނަނީ ފޯކައިދޫގައި ކަމަށް ވާތީ އެމީހުންނަށް ހޯމް އެޑްވާންޓޭޖް އޮންނާނެއެވެ. މިއަދުގެ މެޗްގައި ފޯކައިދޫ ބައްދަލުކުރާނީ ފީވަކު ހޭންޑްބޯޅަ ޓީމާއެވެ.
ފީވަކު ޓީމުވެސް ވަނީ މުބާރާތައް ވަރަށް ބޮޑަށް ތައްޔާރުވެފައި ކަމަށް މަޢުލޫމާތު ލިބެއެވެ. އަދި ތަމްރީނުތައް ހޯދުމުގެ ގޮތުން ރަޙްމަތްތެރިކަމުގެ މެޗުތަކެއް ވެސް ވަނީ ކުޅެފައެވެ. އެގޮތުން މުބާރާތުގެ އެއް ފޭވަރިޓްކަމަށް ގިނަ ބަޔަކު ދެކޭ މިލަންދޫ ޓީމާ ދެކޮޅަށް ވެސް މެޗެއް ކުޅެފައި ވެއެވެ.
ފޯކައިދޫ ޓީމުން މަޢުލޫމާތު ދިންގޮތުގައި ކޮންމެ މެޗެއް ވެސް އެމީހުން ނަގާނީ ވަރަށް ސީރިއަސްކޮށް ކަމަށާއި، ސަޕޯޓަރުންގެ ކުރިމަތީ ކުޅޭއިރު، އެމީހުން މާޔޫސްވެދާނެ ފަދަ އެއްވެސް މަންޒަރެއް ފެންނަން ނޭދޭކަމަށާއި، ރައްޔިތުންގެ އުންމީދަށް ވާޞިލުވާން މަސައްކަތްކުރާނެ ކަމަށެވެ.
