މޮޅު ނެށުމުގެ ފަރި ޙަރަކާތްތަކުން މަޝްހޫރުކަން ލިބުނު އަދި ބުރުސޫރަ ރީތިކަމަށް މުޅި ބޮލީވުޑްގައި އެންމެ ނަންހިނގާ އެއް ތަރިކަމަށްވާ މަލައިކާ އަރޯރާއަށް ލޯބީގައި އަނެއްކާ ވެސް ނާކާމިޔާބީއެއް ކުރިމަތިވެއްޖެއެވެ. ދުވަސްތަކެއް ވަންދެން ފޮޅުވި ލޯބީގެ މައު އަނެއްކާވެސް މޭވާއަކަށް ނުވެ، މޯޅިވެގެން ވެއްޓިއްޖެއެވެ.
އުމުރުން 51 އަހަރުގެ މަލައިކާ އެންމެ ފަހުން ހިތާވެގެން އުޅުނު އަރުޖުން ކަޕޫރު ވެސް ރުޅިވެއްޖެކަން ދާދި ފަހަކުން ވަނީ އިޢުލާން ކޮށްފައެވެ. މަލައިކާގެ ފުރަތަމަ ކައިވެންޏަށް ދަރިއަކު ލިބިފައި ވެއެވެ. އަރުބާޒް ޚާން އާއި މަލައިކާއަށް ލިބިފައިވާ ފިރިހެން ދަރިފުޅު މިހާރު ވަނީ ބޮޑުވެފައެވެ. އެ ކައިވެނި ރޫޅުމަށްފަހު ވެސް އެތައް ބަޔަކާއެކު ޒަވާޖީ ޙަޔާތެއް ފެށޭތޯ މަސައްކަތް ކޮށްފައި ވެއެވެ. އޭގެ ތެރޭގައި ދިވެއްސަކު ވެސް ހިމެނޭކަމަށް ވަނީ މަޢުލޫމާތު ލިބިފައެވެ. އަދި އޭނާގެ ހިތުގައި ދިވެހިރާއްޖެއަށް އޮތް ޚާއްޞަ ލޯތްބަކީ އެއީކަމުގައި ވުމަކީ އެކަށީގެންވާ ކަމެކެވެ.
މަލައިކާ އަކީ އިންޑިޔާ އާއި މުޅި ދުނިޔޭގެ ލޯބި އޮހެމުންދާ ވަރަށް ރީތި އަންހެނެކެވެ. ފިޓްނަސް ދެމެހެއްޓުމާއި، އަންހެނުންގެ މިނިވަންކަމާ ޙައްޤުތަކުގެ ދިފާޢުގައި ވަކާލާތުކުރާ އިސް ފަންނާނެކެވެ. އުމުރުން ބައިޤަރުނުވެފައި ވީނަމަވެސް ޒުވާނެއް ފަދަ ރީތި ފަރި މަލައިކާ ބޭނުންވަނީ އޯގާތެރި ވަފާތެރި ބައިވެރިއެކެވެ.
