މިހާރަކަށް އައިސް މާލެއިން ފެންނަ އަދަޔާ ޚިލާފު އެއްކަމަކީ ސިނގިރޭޓް ގަންނަން ގޮސް ތިބޭމީހުންގެ ދިގު ކިޔޫ އެތައް ފޫޓަކަށް ދެމިފައިވާ މަންޒަރެވެ. ޚިދުމަތް ހޯދުމަށް ކިޔޫ ހެދުމަކީ ރާއްޖޭގައި ވަރަށް ޢާންމު ކަމެކެވެ. އެހެން ނަމަވެސް ސިނގިރޭޓް ގަތުމަށް ކިޔޫ ހެދަންޖެހުމަކީ ޢާންމު ކަމެއް ނޫނެވެ.

ރާއްޖެއަށް ސިނގިރޭޓް އެތެރެކުރާ އެންމެ ބޮޑު ވިޔަފާރި އަކީ އޯކިޑުމަގުގައި ހުންނަ ރޫޓް ނަމަކަށް ކިޔާ ފިހާރައެވެ. އެއީ އެންމެ ފުޅާދާއިރާއެއްގައި ސިނގިރޭޓާއި އެބާވަތުގެ މުދާ ވިއްކާ ފިހާރައެެވެ. މިދުވަސްކޮޅަކީ އެތަނަށް ވަރަށް ބާރުބޮޑު ދުވަސްކޮޅެކެވެ. ހޯލްސޭލްކޮށް ސިނގިރޭޓް ގަންނަން ބޭނުންވާ ފަރާތްތަކުން އެތަން ހުޅުވުމުގެ މާކުރިން ގޮސް ތިބެނީ ކިޔޫ ހަދައިގެންނެވެ.

ދާދި ފަހަކުން ސަރުކާރުން ވަނީ ސިނގިރޭޓުން ނަގާ ޑިއުޓީ ބޮޑުކޮށްފައެވެ. އަދި ބައެއް ކަހަލަ ބާވަތްތައް ބޭނުންކުރުން މަނާކުރުމަށް ވެސް ވަނީ ނިންމާފައެވެ. މި ބަދަލުތަކާއެކު ދުންފަތުގެ އިސްތިޢުމާލުކުރާ ފަރާތްތަކަށް ދަތިތަކާ ކުރިމަތިލާން ޖެހިފައި ވެއެވެ. އެގޮތުން މިހާރު ދިމާވާ އެންމެ ބޮޑު ދައްޗަކީ ސިނގިރޭޓް ލިބުމުގެ ދަތިކަމެވެ.

މިލައުތުރާ ވާހަކަދެއްކި މީހަކު ބުނިގޮތުގައި ކުރިން ސިނގިރޭޓް ލިބެންހުންނަ އެތަކެއް ފިހާރައަކުން މިހާރު ސިނގިރޭޓެއް ނުވިއްކައެވެ. އެފަދަ ފިހާރަތަކުން ބުނަނީ ސިނގިރޭޓް ހޯލްސޭލްކޮށް ގަންނަން ނުލިބެނީކަމަށާއި، ކިޔޫގައި ތިބެން ދާން ބޭނުންވެސް ނުވަނީ ކަމަށެވެ.

މިބަދަލުތަކާއެކު ސިނގިރޭޓުގެ ކަޅުބާޒާރެއް ވެސް ވަނީ އުފެދިފައެވެ. އެގޮތުން ބޮޑު އަގުގައި ސިނގިރޭޓް ވަކި ފޮށި ވިއްކާ މީހުންނާއި، ގުޅާލުމުން ގެންގޮސްދޭ ފަރާތްތަކެއް ވެސް ޙަރަކާތްތެރިވާން ފަށައިފިއެވެ. އެގޮތުން ދުވާލުގެ ގަނޑިތަކުގައި ސިނގިރޭޓް ފޮށްޓެއް  150 ރުފިޔާއަށް އަދި ރޭގަނޑު 12 ގެ ފަހުން 200 ރުފިޔާއަށ ފޮށްޓެއް ވިއްކާކަމަށް މަޢުލޫމާތު ލިބެއެވެ.