ދިވެހިރާއްޖޭގެ ޤުދުރަތީ ރީތިކަމާ ގުޅުވައިގެން ތައިލޭންޑްގެ ވެރިރަށް ބެންކޮކްގައި ފަތުރުވެރިންނަށް ރެސްޓޯރެންޓެއް ހުޅުވައިފިއެވެ. މި ރެސްޓޯރަންޓް ފަރުމާކޮށްފައި ވަނީ ރާއްޖޭގެ ރިސޯޓްތަކުގައި ބޭނުންކޮށްފައިވާ މޫދުކޮޓަރި ކޮންސެޕްޓަށެވެ.
އެމީހުން މި ރެސްޓޯރަންޓް އިޝްތިހާރުކުރަމުން ގެންދަނީ ވެސް ރާއްޖޭގެ ނަން ބޭނުންކޮށްގެންނެވެ. ސޯޝަލް މީޑިޔާގައި ކުރިއަށްގެންދާ ކެމްޕެއިންގެ ސަބަބުން އެ ރެސްޓޯރަންޓަށް ވަނީ ބޮޑު ސަމާލުކަމެއް ލިބިފައެވެ. ”ނިއު މޯލްޑިވްސް ސްޓައިލް ކެފޭ ބެންކޮކް“ ގެ ނަމުގައި އިޝްތިހާރުކުރާ އެ ރެސްޓޯރަންޓްގައި ވެސް މޫދުކޮޓަރިތަކެއް ގޮތަށް ވަކި ވަކި ކޮޓަރިތަކުގައި މޭޒުތައް ބަހައްޓާފައި ވެއެވެ.
ތަފާތު ރެސިޕީތަކަށް ތައްޔާރުކުރާ އެކި ބާވަތް ބާވަތުގެ ސީފުޑް ކުއިޒިންތައް އެމީހުންގެ މެނޫގައި ހިމަނާފައި ވެއެވެ. އަދި އެންމެ ފާހަގަކޮށްލެވޭ ކަމަކީ މެނޫ އައިޓަމެއްގެ ގޮތުގައި ދިވެހި ގަރުދިޔަ ވެސް ހިމަނާފައި ވާކަމެވެ.
