ށ. އަތޮޅުގައި ބާއްވާ އެންމެ ބޮޑު ހޭންޑްބޯޅަ މުބާރާތުގެ ގްރޫޕް ސްޓޭޖުގައި މިހާތަނަށް ކުޅުނު އެއްވެސް މެޗަކުން ބަލި ނުވެ، ހުނަރުވެރި ޒުވާން ޓީމުގެ ކުޅުންތެރިން ނުހިފެހެއްޓި ދަނޑުމަތީ އުދުހެމުން ފުމެމުން ދުވާ މަންޒަރުތަކަށް ވަނީ ބޮޑު ސަމާލުކަމެއް ލިބިފައެވެ.

ފޯކައިދޫގެ ކުޅުންތެރިންގެ ޙަމަލާތައް ހުއްޓުވުމަށްޓަކައި ޓީމުތަކުން އެމީހުންގެ ޑިފެންސްލައިން އިތުރަށް ވަރުގަދަކޮށް، އެޓޭކް ކޮމްޕްރޮމައިޒް ކުރަންޖެހޭތަން ފެންނަނީ މަދެއްކޮށެއް ނޫނެވެ. އެންމެފަހުން ރޭގައި ގޮއިދޫ ޓީމާ ދެކޮޅަށް ކުޅުނު މެޗުގައި ވެސް ފެނިގެންދިޔައީ އާދަޔާޚިލާފު މޮޅު ކުޅުމެކެވެ. ފޯކައިދޫގެ ޒުވާން ކުޅުންތެރިން ނުހިފެހެއްޓި ދޫވެގެންދިއުމުގެ ނަތީޖާއެއްގެ ގޮތުން ބޮޑު ތަފާތަކުން މެޗް ކާމިޔާބުކުރީ ފޯކައިދޫ ހޭންޑްބޯޅަ ޓީމުންނެވެ.

މެޗުގެ ފަހު ހާފުގައި ގޮއިދޫ ޓީމު ވަރަށް ބޮޑަށް ޕްރެޝަރަށް ވެއްޓި ހެދި ފައުލްތަކުގެ ނަތީޖާއެއްގެ ގޮތުން ދަނޑުގައި އެންމެ 3 ކުޅުންތެރިން ތިބެ ކުޅެންޖެހުނު ވަގުތަަށް ވެސް ފެނިގެންގޮސްފައި ވެއެވެ. އެފަދަ ވަގުތުތަކުގެ އެޑްވާންޓޭޖު ނަގާ ފޯކައިދޫއިން ތަފާތު ބޮޑުކޮށްލިއެވެ. ފުލު ފުލުގައި ގޯލަށް އަމާޒުކުރި އެޓޭކްތަކާއެކު 22 – 7 ލަނޑުން މެޗް ކާމިޔާބުކުރީ ފޯކައިދޫ ހޭންޑްބޯޅަ ޓީމުންނެވެ.