ށ. އަތޮޅުގައި މިހާރު ކުރިއަށްދާ އަތޮޅު ހޭންޑްބޯޅަ މުބާރާތުގައި ފޯކައިދޫ ހޭންޑްބޯޅަ ކުލަބުން މިހާތަނަށް ކުޅުނު އެއްވެސް މެޗަކުން ބަލިނުވެ، ގުރޫޕުގެ އެއްވަނަ ޓީމްގެ ގޮތުގައި ސެމީ ފައިނަލަށް ދަތުރުކޮށްފިއެވެ.

ގުރޫޕް-އޭގެ މެޗުތައް ހޯސްޓްކުރަނީ ފޯކައިދޫގައެވެ. ގުރޫޕް ސްޓޭޖުގައި ފޯކައިދޫ ކުޅެންޖެހޭ އެންމެ ފަހު މެޗު އޮތީ މިއަދު ހަވީރު ފޯކައިދޫ ރަސްމީ ބޯޅަދަނޑުގައެވެ. މި މެޗުގައި ބައްދަލުކުރީ މުބާރާތުގައި އެންމެ ވަރުގަދަ އެއް ޓީމުކަމަށްވާ ކަނޑިތީމް ހޭންޑްބޯޅަ ޓީމާއެެވެ. މި މެޗު ފޯކައިދޫއިން ކާމިޔާބުކުރީ 23 – 20 ލަނޑުންނެވެ. މި މެޗުގެ މޮޅުކުޅުންތެރިއަކަށް ހޮވުނީ ފޯކައިދޫގައި ވިދަމުންއަންނަ ހޭންޑްބޯޅަ ތަރިއެއްކަމަށްވާ ޖާޒީ ނަންބަރު 30 ޝައުކާއެވެ.

މެޗުގެ ހާފުޓައިމްގެ ކުޅުން ނިމިގެންދިޔައިރު، ބޮޑު ލީޑަކާއެކު ފޯކައިދޫ ކުރީގައި އޮތްނަމަވެސް ފަހު ހާފުގައި ފަހަތުން އަރާ ކަނޑިތީމު ޓީމުން ވަނީ ތަފާތު ކުޑަކޮށްލާފައެވެ. ފަހު ހާފުގައި ކަނޑިތީމު ޓީމުން ފެނިގެންދިޔައީ ވަރަށް މޮޅު ކުޅުމެކެވެ. އަދި ފޯކައިދޫ ޓީމުގެ މުހިންމު ކުޅުންތެރިއެއް ކަމަށްވާ ޖާޒީ ނަންބަރު 27 ރިޝާމާއަށް ރަތްކާޑު ދެއްކުމުގެ ސަބަބުން މައްސަލަތަކާ ކުރިމަތިވިއެވެ.