ދިވެހިރާއްޖެއިން ފުރަތަމަ ފަހަރަށް މިސް ޔުނިވާސް ރީތީގެ މުބާރާތުގައި ވާދަކުރި މިސް ޝައިނާއަށް މުބާރާތުގެ ޓޮޕް-20 އިން ޖާގައެއް ނުލިބި މުބާރާތާ އަލްވަދާޢުކިޔަން ޖެހިއްޖެއެވެ.

މިސް ޔުނިވާސް ރީތީގެ މުބާރާތުގައި ދިވެއްސަކު ބައިވެރިވާން ނިންމުން ވެގެންދިޔައީ ވަރަށް ބޮޑަށް ޚިޔާލުތަފާތުވުންތައް އުފެދިގެންދިޔަ މައްސަލައަަކަށެވެ. އެކަން ކުއްވެރިކޮށް ސަރުކާރުގެ ފަރާތުންވެސް ބަޔާންތައް ނެރުއްވާފައި ވެއެވެ. ރާއްޖޭގެ ގިނަ ބަޔަކު ދެކޭގޮތުގައި އެއީ ސައްތައިން ސައްތަ މުސްލިމް ޤައުމަކުން އެއްގޮތަކަށް ވެސް ބައިވެރިވާ ކަހަލަ މުބާރާތެއް ނޫނެވެ.

އަދި ޢިލްމުވެރިން ސިފަކުރައްވާފައި ވަނީ އެއީ ބޮޑު މުންކަރާތެއްގެ ގޮތުގައެވެ. އަދި އެންމެ ބޮޑު ކަންބޮޑުވުމަކަށްވީ އެފަދަ މުބާރާތްތަކުގައި ނިވާކަންކުޑަ ހެދުންއަޅަންޖެހޭ މައްސަލައެވެ. އެހެންކަމުން އެންމެންވެސް ހީކޮށްގެން ތިބީ ޝައިނާ ވެސް ބިކިނީގައި ފެންނާނެ ކަމަށެވެ. ނަމަވެސް، އެޔާ މުޅިން ޚިލާފަށް ޝައިނާ ފެނިގެންދިޔައީ އޭނާގެ ޘަޤާފަތް ފުރިހަަމައަށް ތަމްސީލުކޮށްދިން ބައިވެރިއެއްގެ ގޮތުގައެވެ.

ޝައިނާގެ ހެދުންތައް ފަރުމާކޮށްފައި ވަނީ ނިވާކަން ބޮޑުވާގޮތަށް ދިވެހިރާއްޖޭގެ ޘަޤާފަތް ވެސް ރަމްޒުކޮށްދޭ ފުރިހަމަ ފަރުމާތަކެއްގެ ގޮތުގައެވެ. އެހެން ނަމަވެސް ކުރިން އަންދާޒާކުރި ގޮތާއި މުޅިން ޚިލާފަށް އޭނާ ފެނުނީ އިސްކޮޅުން ދިގު ވަރަށް ރީތި އަންހެނެއްގެ ގޮތުގައެވެ. އެހެންކަމުން ވަރަށް ގިނަ ބައެއްގެ ތަޢުރީފު އޭނާގެ ރީތިކަމަށް މިހާރު ލިބެމުން އެބަދެއެވެ. އަދި އަނެއް ބަޔަކު އުންމީދުކުރި ގޮތަށް ވަނާތައް ފެންނަ ހެދުން އަޅާފައިނުވާތީ އާއި، ރާއްޖޭގައި އޮތް ބޮޑީ ބިލްޑިންގ ޗެމްޕިއަންޝިޕްގައި ފިރިހެނުންތަކެއް “ރޮދި ޖަނގިޔަލުގައި” ފެނުމުން ވަނީ މާޔޫސްވެފައެވެ.